Áskerı qyzmetshi 15-qabattan sekirmek bolǵan jasóspirimdi aman alyp qaldy

ASTANA. QazAqparat - Astanada turǵyn úıdiń 15-qabatynan sekirmek bolǵan jasóspirimdi Qarýly kúshterdiń áskerı qyzmetshisi qutqaryp qaldy, dep habarlaıdy QazAqparat Qorǵanys mınıstrligine silteme jasap.

Serjant Erik Ysqaqov 83205 áskerı bóliminiń tehnık-júrgizýshisi. 20 tamyzda Astana qalasynyń «Ońtústik-shyǵys» shaǵyn aýdanynda turatyn týystaryna kelgen.

«Kútpegen jerden jıenim kórshi kópqabatty úıde qyz balkonnan sekirmek bop jatyr dep aıqaılady. Muny kórip, kireberiske júgirip baryp, lıftpen 14-qabatqa shyqtym. 15-ke baspaldaqpen kóterildim. Jaılap jaqyndap, balkonnan ony tartyp túsirip aldym», - deıdi ol.

Tómende qutqarýshy men jasóspirimdi TJM, polıtsııa jáne medıtsına qyzmetkerleri kútip turdy.

Osylaısha, Erik Ysqaqov oqıǵaǵa beıjaı qaramaı, oqys jaǵdaıda batyl áreket etip, adam ómirin saqtap qaldy. Ol óz áreketin erlik dep sanamaıdy, alaıda jasóspirimdi orny tolmas qaıǵydan qutqara alǵanyna qýanyshty.

Aıta ketsek, 35 jastaǵy áskerı qyzmetkerdiń ózi tórt balanyń ákesi. Túrkistan oblysy Arys qalasynyń oq-dári qoımasyndaǵy jarylys kezinde turǵyndardy evakýatsııalaýǵa qatysqan.