Áskerı qyzmetkerler arasynda ónertapqyshtar baıqaýy ótti
Sharaǵa Radıoelektronıka jáne baılanys áskerı-ınjenerlik ınstıtýty, Áýe qorǵanysy kúshteriniń áskerı ınstıtýtynyń professorlyq-oqytýshylar quramy men kýrsanttary, «Ońtústik», «Shyǵys» jáne «Batys» óńirlik qolbasshylyqtarynyń áskerı qyzmetshileri qatysty. Atalmysh baıqaýǵa 23 jumys usynyldy, dep habarlady QR Qorǵanys mınıstrliginiń baspasóz qyzmeti.
Ulttyq qorǵanys ýnıversıtetiniń áskerı-ǵylymı zertteý ortalyǵy júrgizgen saraptama nátıjeleri boıynsha joǵary upaı jınaǵan jáne ádistemelik talaptarǵa sáıkes keletin toǵyz joba odan ári jumys isteýge usynyldy.
Áýe qorǵanysy kúshteri áskerı ınstıtýtynyń professorlyq-oqytýshylar quramy ázirlegen jattyǵý kesheni baıqaý jeńimpazy atandy. L-39S ÝBS ınnovatsııalyq protsedýralyq jattyqtyrý kesheni synaqtan ótip, kýrsanttardyń oqytý protsesine engizildi.
DCS World kompıýterlik baǵdarlamasyna negizdelgen áýe údetkishinde ushaq, qozǵaltqysh jáne qarý-jaraq júıeleri modeldenedi. Keshen ushý qyzmeti úshin asa mańyzdy jeke qasıetterdi qalyptastyrýǵa baǵyttalǵan jattyǵý daıyndyǵynyń kóp deńgeıli júıesin tolyq qamtamasyz etýge múmkindik beredi.
Jobany ázirleýshi, aqparattyq tehnologııalar bóliminiń bastyǵy maıor Erjan Tileýǵabylovtyń pikirinshe, jattyqtyrý keshenin daıyndaý kezeńinde zamanaýı aqparattyq tehnologııalardyń qoldanylýy áskerı ushqyshtardy oqytý úderisiniń tıimdiligin arttyrýǵa múmkindik beredi. Oqý úrdisin kompıýterlik oıynmen biriktirý baǵdarlamany jaqsy ıgerýge jáne daǵdylardy qalyptastyrýǵa yqpal etedi.
Taǵy bir nazar aýdararlyq jobanyń biri Radıoelektronıka jáne baılanys áskerı-ınjenerlik ınstıtýtynda jasalǵan «Qarańǵy ýaqytta kórýdi arttyrýdyń optıkalyq-elektrondy júıesiniń prototıpi». Ony áskerı radıotehnıka jáne elektronıka negizderi kafedrasynyń sandyq elektronıka tsıkliniń dotsenti podpolkovnık Nurjan Zikirııaev jasady.
Atalmysh joba – aqparatty kórsetý, jer bederin vızýalızatsııalaý jáne ınfraqyzyl dıapazondaǵy jaryq júıesi kórsetedi. Sondaı-aq ol áskerı mashınalardyń ekıpajdaryna qarańǵyda baqylaý júrgizýge jáne jaryqty paıdalanbaı qozǵalýǵa múmkindik beredi. Bul ekıpajdardyń jaýyngerlik múmkindikteri men ómirsheńdigin aıtarlyqtaı arttyrady.