Áskerı kýrsanttar ushý praktıkasyna kiristi (FOTO)

ASTANA. QazAqparat - «Hlebodarovka» áýeaılaǵynyń bazasynda Keńes Odaǵynyń eki márte batyry Talǵat Bıgeldınov atyndaǵy Áýe qorǵanysy kúshteri Áskerı ınstıtýtynyń 4-kýrs kýrsanttary oqý-jattyqtyrý sekirýlerin oryndaýǵa kiristi, dep habarlady QR Qorǵanys mınıstrliginiń baspasóz qyzmeti.

Jattyqtyrý sekirýleri 600 metr bıiktikten D1-5Ý parashıýtinde oryndaldy. Praktıkalyq sabaqtar aıaqtalǵannan keıin kýrsanttardy eki topqa bólip, olarǵa ushqysh nusqaýshylardy bekitip berdi. Ári qaraıǵy sabaqtar solardyń jetekshilik etýimen ótkiziletin bolady. Kýrsanttardyń ushý daıarlyǵy aǵymdaǵy jyldyń qyrkúıegine deıin jalǵasady. Praktıka kezinde árbir kýrsant MI-8 tikushaǵynda 20 saǵattan ushyp ótýi tıis. Osyny aıaqtaǵannan keıin olar memlekettik emtıhan tapsyrýy tıis. Sodan keıin ǵana olarǵa «leıtenant» áskerı ataǵy beriledi.

Mundaı praktıka barysynda kýrsanttarda áýe jaýyngeriniń qasıetteri qalyptasady. Sebebi, ózdiginen ushý kezinde ǵana avıatsııa men Otanǵa qyzmet etýge ózin sarp etýge ázir ushqysh ómirge keledi. Áýe qorǵanysy kúshteriniń Áskerı ınstıtýty Qazaqstan ÁÁK úshin kadrlardyń negizgi ustahanasy bolyp tabylatynyn aıta ketken jón. Joǵary oqý ornynda maıdańsheptik, armııalyq jáne áskerı-kólik avıatsııasy úshin shabýyldaýshy ushqyshtardy, sondaı-aq barlyq qajetti saladaǵy ınjenerlerdi daıyndaıdy.