Áskerı qyzmetshilerge buryn toqtatylǵan birqatar jeńildik qaıtarylýy múmkin

<p>ASTANA. KAZINFORM &ndash; 2025 jyldyń 1 qańtarynan memlekettik kúshtik qurylymdar qyzmetkerleriniń eńbek aqysyn tóleý jańa júıemen júrgiziledi. Bul týraly Májilis depýtattarynyń saýalyna Qorǵanys mınıstriniń orynbasary general-maıor Baqytbek Sydyqovtyń jaýabynda aıtylǵan.</p>

«Búgingi kúni Úkimet memlekettik kúshtik qurylymdar qyzmetkerleriniń eńbek aqysyn tóleýdiń jańa júıesine kóshýin qoldady. Ony 2025 jylǵy 1 qańtardan bastap 2 kezeńmen (2025-2026 jyldary) júzege asyrý josparlanǵan. Oǵan tolyq kólemde ótý barysynda Qarýly kúshterdiń áskerı qyzmetshileriniń laýazymdyq jalaqylary ortasha 50 paıyzǵa ósedi», - dedi general-maıor.

Sondaı-aq, Baqytbek Sydyqov áskerı qyzmetshilerge buryn toqtatylǵan jeńildikterdi qaıtarý boıynsha jumys júrgizilip jatqanyn atap ótedi.

Olar mynalar:

- áskerı qyzmetshilerge kommýnaldyq qyzmet úshin tólenetin ústemaqyny otbasynyń árbir múshesine tóleı otyryp, onyń kólemin ózgertý;

- áskerı qyzmetshiler men onyń otbasy músheleriniń jylyna bir ret demalys ornyna barý jáne qaıtýy úshin jol júrý aqysynyń tegin bolýyn qaıtarý;

- áskerı qyzmetshilerdiń qoǵamdyq kólikterde tegin júrýin qaıtarý;

- áskerı qyzmetshilerdiń jaýyngerlik, jumyldyrý jáne jedel daıyndyq baǵdarlamalary boıynsha 1 táýlikten artyq dalalyq jaǵdaılarda bolýy barysynda, sondaıaq arnaıy dalalyq jumystardy oryndaý barysynda táýliktik normanyń 60 paıyz esebinen dalalyq aqshalaı úlesti qaıtarý.