Áskerı qyzmetshiler 6 oblysta sý tasqyny saldaryn joıýǵa kómektesip júr

<p>ASTANA. KAZINFORM &ndash; Ótken táýlikte sý tasqynyna qarsy is-sharalarǵa 2 262 áskerı qyzmetshi, 137 avtokólik pen 5 avıatsııa ushaǵy jumyldyryldy. Bul týraly QR Qorǵanys mınıstrliginiń resmı ókili Rýslan Jangýlın aıtyp berdi.&nbsp;</p>

«Armııalyq avıatsııa eldi mekenderden 113 adamdy evakýatsııalady, 11 tonna júk tasymaldandy. Atyraý qalasynda jergilikti jer ýchaskeleri men turǵyn alabynyń sý basýyn boldyrmaý úshin jedel shtab sheshimimen «Ońtústik» óńirlik qolbasshylyǵynyń 406 adamnan turatyn jeke quramy men 25 tehnıkasy jiberildi», - dedi spıker Respýblıkalyq aqparattyq shtabta ótken brıfıngide.

Sondaı-aq Atyraý oblysy Mahambet aýdanynda Jaıyq ózeni arnasynyń boıyna qum salynǵan qaptardy tóseldi. Jem ózeni arnasynyń jaǵalaýyn nyǵaıtý jumystary júrgizildi.

Aqtóbe oblysy Oıyl kenti aýdanyndaǵy parom ótkelimen táýligine 9 parom reısi jasaldy. Onda 75 adam evakýatsııalanyp, 35 kólik, 3 tonna gýmanıtarlyq kómek jóneltildi.

Aqtaý avıabazasynyń ekıpajy ushqyshsysyz ushý apparatynyń kómegimen Jaıyq ózeniniń arnasyndaǵy jergilikti jerdi aerobaqylaý jáne barlaý júrgizip jatyr. 

Batys Qazaqstan oblysynda Qarýly kúshterdiń áskerı qyzmetshileri qum salynǵan qaptardy daıyndaý jáne tóseý, Jaıyq ózenindegi bógetti nyǵaıtý, Aqjaıyq aýyldyq okrýgindegi Elek ózeniniń jaǵalaýyn nyǵaıtý jumystaryn júrgizdi. Báıterek aýdanynyń Jambyl kentinde gýmanıtarlyq kómekti túsirý jumystary júrgizildi. Desanttyq-shabýyldaý áskerleriniń áskerı qyzmetshileri Magıstralnyı, Podstepnoe, Baıqonys, Zarechınsk, Býdarın, Jańabulaq jáne Chapaev aýyldarynda bógetter turǵyzdy.

Petropavl qalasynda áskerı qyzmetshiler qala mańyndaǵy aınalma joldy nyǵaıtý, Beskól kenti aýdanyndaǵy bógetti kúsheıtý, eldi mekenderden adamdardy evakýatsııalaý mindetterin oryndady. Esil ózeniniń shyǵys jaǵasyn nyǵaıtý jumystary júrgizildi. 

Aqmola oblysy Jarqaıyń aýdany Zarechnyı, Dalabaı, Tasótkel jáne Tassýat aýyldarynda elordalyq erekshe maqsattaǵy brıgadanyń áskerı qyzmetshileri tirshilik etý obektilerin elektr qýatymen qamtamasyz etý jumystaryn jalǵastyrdy.

«Jalpy 27 naýryz ben 13 sáýir aralyǵynda qarýly kúshterden sý tasqynyna qarsy is-sharalarǵa jeke quramnyń 4 959 adamy, 166 avtomobıl tehnıkasy, 5 avtobýs, armııa avıatsııasynyń 11 tikushaǵy, 5 áskerı-kóliktik ushaǵy jumyldyryldy», - dedi R. Jangýlın.

Eske sala keteıik, buǵan deıin qyzylordalyqtar sý tasqyny bolǵan aýmaqtarǵa gýmanıtarlyq kómek jiberip jatqanyn jazǵan edik.