Áskerı kemelerdiń úzdik ekıpajdary marapattaldy

ASTANA. QazAqparat – Astanada Áskerı-teńiz kúshteriniń 30 jyldyǵyna arnalǵan saltanatty jıyn ótti, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Orkestrdiń súıemeldeýindegi áskerı marsh, teńizshilerdiń saltanatty kıimi, qoǵam ókilderi, «Jas sarbaz» áskerı-patrıottyq qozǵalysynyń tárbıelenýshileri, áskerı qyzmetshilerdiń otbasy músheleri, osy ásker túriniń negizin qalaýshy ardagerler merekelik kóńil-kúıdiń sánin keltirdi.

Qorǵanys mınıstriniń orynbasary, general-leıtenant Sultan Kamaletdınov Áskerı-teńiz kúshteriniń jeke quramy men sharaǵa qatysýshylardyń bárin tarıhı oqıǵamen quttyqtady.

«Sizder elimizdiń Qarýly Kúshterimen bir sapta Jańa Qazaqstandy qurýdyń strategııalyq baǵdarlamasyn dáıekti túrde iske asyrasyzdar. Memlekettiń qaýipsizdigin, azamattardyń beıbit ómir súrip, eńbek etýine atsalysyp, qurmetti ári jaýapty mindetti oryndap júrsizder», - dedi ol.

Bul ásker túriniń qalyptasýy men damýynyń bastaýynda turǵan Áskerı-teńiz kúshteriniń ardagerlerine erekshe alǵys aıtyldy.

Qarýly kúshterdiń ardageri, kýrsanttan bastap Táýelsiz Qazaqstan Áskerı-teńiz kúshteriniń bas qolbasshysyna deıingi áskerı ómir mektebinen ótken kontr-admıral Ratmır Komratov bul ásker túriniń qalaı qalyptasqany jaıly estelikterimen bólisti.

Saltanatty jıynda kemelerdiń úzdik ekıpajdary marapattaldy. Qyzmettegi jetistikteri úshin polkovnık Ýálıhan Súleımenov, podpolkovnıkter Ivan Ponamarenko jáne Alekseı Shpılev, 3-dárejeli kapıtan Vasılıı Agapıtov jáne 3-synypty starshına Ǵalymjan Tólembaev esimderi atalyp ótti.

Shara Ulttyq áskerı-patrıottyq ortalyǵynyń shyǵarmashylyq ujymy qoıǵan kontsertpen aıaqtaldy.

Aıta ketsek, 1993 jyly 2 sáýirinde Memleket basshysynyń Jarlyǵymen eldiń Áskerı-teńiz kúshteri quryldy. Qarýly kúshterdiń derbes ásker túri retinde olar «Qazaqstan Respýblıkasy Qarýly Kúshteriniń qurylymyn odan ári jetildirý jónindegi sharalar týraly» Jarlyq shyqqannan keıin 2003 jyldyń 7 mamyrynda túpkilikti qalyptasty.