Áskerı ınfraqurylym qalaı jańartylyp jatyr – vıtse-mınıstr jaýaby

ASTANA. QazAqparat – Qorǵanys mınıstriniń orynbasary Rýslan Shpekbaev Májilis depýtattarynyń saýalyna bergen jaýabynda keńes armııasynyń standarttaryna sáıkes qurylǵan áskerı ınfraqurylym qalaı jańartylatynyn aıtty, dep habarlaıdy QazAqparat tilshisi.

Mınıstr orynbasarynyń málimeti boıynsha, armııany tsıfrlandyrý baǵytynda bıyl mynandaı is-sharalar josparlanǵan:

- Qurlyq áskerin avtomattandyrylǵan basqarý júıeleriniń arnaıy baǵdarlamasyn satyp alý;

- basqarý pýnkterin jáne jaýyngerlik basqarý ortalyqtaryn qajetti aqparattyq-kommýnıkatsııalyq ınfraqurylymmen jaraqtandyrý;

- derekter berý kóliktik jelisiniń jabdyǵyn satyp alý;

- Qarýly kúshterdiń áskerı bólimderi men mekemelerinde montajdaý jáne iske qosý-retteý jumysyn júrgizý.

«Qazirgi áskerı ınfraqurylym keńes armııasynyń standarttaryna sáıkes qurylǵan. Búgingi tańda bizdiń aldymyzda armııany transformatsııalaý jóninde kúrdeli tapsyrma tur. Biz jańa garnızondardy, áskerı qalashyqtardy buryn olar bolmaǵan jerde salyp jatyrmyz. El aýmaǵyn jedel jabdyqtaý jóninde is-sharalar oryndalýda. Oq-dárilerdi saqtaýǵa arnalǵan qaýipti obektiler eldi mekennen tysqary jerlerge ornalastyrylýda. Áskerı qyzmettiń bedelin arttyrý jáne áskerı qyzmetshilerdi áleýmettik qamtamasyz etý jóninde sharalar qabyldanýda», - dep jazylǵan jaýapta.