Áskerı dárigerler ólim aýyzyndaǵy qyz balany qutqaryp qaldy

ASTANA. QazAqparat - Jambyl oblysynda 63302 áskerı bólimi jekelegen medıtsınalyq jasaǵynyń dárigerleri klınıkalyq ólim aýzynda olarǵa kelip túsken qyz balany qutqaryp qaldy, dep habarlaıdy QR Qorǵanys mınıstrliginiń baspasóz qyzmeti.

5 jastaǵy Alına sý toltyrylǵan tsısternaǵa qulap, tunshyǵyp qalǵan. Ony taýyp alǵandar, jaqyn mańda ornalasqan emdeý mekemesine, Otardaǵy 63302 á/b jekelegen medıtsınalyq jasaǵyna jetkizgen.

«Qyz bala klınıkalyq ólim aýzynda jetkizilgen. Onyń teri qabaty sup-sur, sýyq boldy. Dem alýy men júrek qaǵysy bolǵan joq. Kóziniń qarashyǵy barynsha keńeıip ketken. Biz jaqyn mańda ornalasqan birden-bir medıtsınalyq mekememiz. Ony birden anestezııa jáne jan saqtaý bólimshesine alyp ketti», - deıdi medıtsınalyq bólim bastyǵy, reanımatolog-anestezıolog dárigeri m/q podpolkovnıgi Abaı Rysqulov.

Áskerı dárigerler brıgadasy, anestezııa jáne reanımatsııa bólimshesiniń bastyǵy m/q aǵa leıtenanty Saıat Bekibaev, medıtsınalyq bólim bastyǵy, reanımatolog-anestezıolog dárigeri m/q podpolkovnıgi Abaı Rysqulov, meıirbıke, QK qyzmetkeri Raıhan Dádenbaeva jan saqtaý sharalaryna kirisken.

Qyz balanyń tamaǵyna tútikshe qoıyldy, dem alý apparatyna qosylady, 100 paıyz ottegi jibere otyryp, jasandy aýa almastyrý júrgizilgen. Ári qaraı júrekti janama túrde ýqalaý jasalyp, júregine 4 márte adrenalın jáne atropın egilgen. 20-shy mınýtta júrektiń lúpili qalpyna keldi.

«Qyzdyń ókpesinen shamamen 150 ml suıyqtyq pen asqazanynan 1 lıtrdeı sý sorǵyzyp aldyq. Keshke qaraı búldirshinde tirshilik nyshandary paıda boldy. Qarashyǵy jaryqqa reaktsııasy berdi, tańǵa jaqyn qoldary men aıaqtary qımyldady», - dedi Abaı Rysqulov. Odan keıin balaǵa balalar reanımatsıalyq brıgadasy keldi. Al sodan soń áýe kóligimen ony Tarazǵa jóneltken.

Qazirgi ýaqytta balanyń jaǵdaıy qalypty. Bala esin jıdy, týystaryn tanı bastady. Ózdiginen tamaqtanady, sý ishe alady. Qazirgi kezde ońalý kezeńi júrýde. Sol mezette qyzdy qutqaryp qalǵan medıtsınalyq bólim bastyǵy m/k podpolkovnıgi Abaı Rysqulov ózin batyrmyn dep esh eseptemeıdi. «Bul meniń jumysym. Biz bala, eresek, áskerı qyzmetshi nemese azamattyq adam dep bólip-jarmaımyz. Biz úshin birinshi kezekte olardyń barlyǵy emdelýshiler. Bizge jol-kólik apatynan zardap shekkenderdi jıi ákeledi. Óıtkeni, janymyzda Almaty-Qordaı tas joly ornalasqan. Onyń ústine barlyq jaqyn ornalasqan aýyldardyń turǵyndary kómekke júginedi».

QR Qarýly Kúshterinde áskerı medıtsına salasy sapaly jańa deńgeıge kóterilip kele jatyr. Bunyń dáleli retinde sala úshin joǵary bilikti kadrlardyń daıyndyǵy, áskerı-medıtsınalyq mekemelerdiń materıaldyq-tehnıkalyq bazasynyń jetildirilýi jáne áskerı qyzmetshilerdi joǵary sapadaǵy emdeýdi aıtýǵa bolady.