Áskerı boryshyn ótegenderge ýnıversıtette oqýǵa tolyq grant berile me – mınıstr jaýaby

ASTANA. QazAqparat – QR Ǵylym jáne joǵary bilim mınıstri Saıasat Nurbek áskerı boryshyn ótegenderge bilim granty nemese jeńildikter qalaı beriletinin túsindirdi, dep habarlaıdy QazAqparat tilshisi.

«Qorǵanys mınıstrligi taıaýda merzimdi áskerı qyzmetke barǵan jas jigitterge UBT upaıynsyz joǵary oqý ornyna túsýge múmkindik berý bastamasyn kóterdi. Osy bastamany qoldaǵan JOO-lar olarǵa tegin grant berýge daıyn ekenin bildirgen. Bilim sarapshylary bul bastamanyń ózi Konstıtýtsııanyń 30-babyna qaıshy keletinin aıtady. Bul bastamany estidińiz be jáne oǵan baılanysty pozıtsııańyz qandaı?», - degen suraq qoıyldy mınıstrge ortalyq kommýnıkatsııalar qyzmetinde.

Óz jaýabynda S. Nurbek Qorǵanys mınıstrligi mundaı usynyspen ózderi júgingenin aıtty.

«Bul jerde eskeretin eki jaıt bar, birinshiden, biz grantty tek zańdy túrde UBT nátıjesi arqyly bere alamyz. Ekinshiden, Qorǵanys mınıstrligi ózimizdiń birneshe ýnıversıtet, joǵary oqý oryndarymen kelisken jaǵdaıda, biz oǵan qarsy emespiz. Shyn máninde de, jastarymyzdy áskerı qyzmet atqarýǵa yntalandyratyn tetikter tabýymyz kerek. Ókinishke qaraı, qazir kóp jastar áskerge barǵysy kelmeıdi. ıAǵnı áskerı qyzmetten keıin oqytýda halyqaralyq tájirıbege súıený kerek, mysaly Izraılde, AQSh-ta, Eýropa elderinde, myna turǵan Ózbekstannyń ózinde osyndaı tetikter bar. Grant emes, sol ýnıversıtettiń óz jeńildikteri nemese aqyly túrde túsý múmkindigin bere alamyz. Biraq memlekettik grant tek UBT negizinde beriledi. Sondyqtan, bul jerde zańbuzýshylyq joq. Konstıtýtsııany da, UBT mehanızmin de buzbaımyz. Jalpy áskerimizdi, armııamyzdy, Qorǵanys mınıstrligin qoldaýymyz kerek», - dedi Saıasat Nurbek.

Buǵan deıin aqparat quraldarynda áskerı boryshyn ótegen 3 myńǵa jýyq adam joǵary oqý oryndaryna grantpen túse alatyny habarlanǵan edi.