Áskerı boryshyn ótegender endi joǵary oqý oryndarynda tegin bilim alady
22:20, 25 Qazan 2022
ASTANA. QazAqparat - Ǵylym jáne joǵary bilim mınıstri Saıasat Nurbek Qorǵanys mınıstrligi men elimizdiń joǵary oqý oryndary arasyndaǵy kelisimge qol qoıý saltanatyna qatysty, dep habarlaıdy QazAqparat Joǵary bilim jáne ǵylym mınıstrliginiń baspasóz qyzmetine silteme jasap.
Almatydaǵy Respýblıka saraıynda ótken kezdesýge Qorǵanys mınıstri general-polkovnık Rýslan Jaqsylyq jáne joǵary oqý oryndarynyń rektorlary qatysty.
Vedomstvolardyń basshylary áriptesterin Ulttyq mereke – Respýblıka kúnimen quttyqtady.
Qorǵanys mınıstrligi men joǵary oqý oryndarynyń belgilengen merzimde qyzmet etken áskerı qyzmetshilerge tegin joǵary bilim alý múmkindigin berý jónindegi birlesken jobasy da áskerı qyzmettiń bedelin arttyrýǵa yqpal etetin bolady.
Elýden asa joǵary oqý oryndarynyń basshylary qol qoıǵan kelisimde yntymaqtastyq baǵyttary, sondaı-aq merzimdi áskerı qyzmet ótkergen adamdarǵa konkýrstan tys ótýge jeńildikter beriledi.
Kelisimder 2023 jyldan bastap kúshine enedi.