Áskerı boryshyn ótegen 4 myńǵa jýyq jastar úılerine qaıtady

ASTANA. QazAqparat - Merzimdi áskerı qyzmetin ótkergen sarbazdardy saltanatty túrde shyǵaryp salý Qarýly kúshterdiń áskerı bólimderinde júrgiziledi. Barlyǵy 3 800 sarbaz zapasqa shyǵarylatyn bolady, dep habarlaıdy QR Qorǵanys mınıstrliginiń baspasóz qyzmeti.

Merzimdi áskerı qyzmettegi eń úzdik áskerı qyzmetshilerdi shyǵaryp salý jaýyngerlik týmen qoshtasý rásimin ótkizýmen birge saltanatty jaǵdaıda ótedi. Merzimdi qyzmettegi áskerı qyzmetshiler jyl boıy ózderiniń áskerı mamandyqtaryn ıgerip, jaýyngerlik daıarlyqta aıtýly nátıjelerge qol jetkizdi, is-tájirıbe barysynda birneshe márte joǵary jaýyngerlik mashyǵyn kórsetti.

Zapasqa shyǵarý sebepti qyzmettik mindetterin adal atqarǵany úshin, úlgili áskerı tártip pen jaýyngerlik jáne dene daıarlyǵynda kórsetken joǵary kórsetkishi úshin áskerı qyzmetshiler gramotalarmen, alǵys hattarmen, baǵaly syılyqtarmen marapattaldy. Birneshe áskerı qyzmetshilerge kezekti áskerı ataqtar berildi.

Aıta ketken jón, merzimdi áskerı qyzmetin atqarǵan sarbazdardyń basym bóligi Qarýly kúshterde qalyp, ári qaraı kelisimshart boıynsha áskerı qyzmet etsem degen nıetterin bildirdi. «Meniń otbasymda ákem men aǵam áskerı boryshyn ótegen jáne árdaıym sol týraly aıtyp otyratyn. Men de ózimniń jigerimdi qaırap, barlyq qıyndyqtarǵa daıyn bolýdy qaladym. Al endi elime,Otanyma múltiksiz qyzmet etsem deımin», -deıdi efreıtor Rahymjan Talǵatuly.

Atap óteıik, zapasqa shyǵarylǵan áskerı qyzmetshilerdiń ornyna Qarýly kúshterimiz úshin laıyqty tolyqtyrý bolatyn jańadan merzimdi áskerı qyzmetke shaqyrylǵandar keletin bolady.