Áskerı azamattardyń mártebesi úlken kóńil bólýdi qajet etedi -«Generaldar keńesi» RQB-niń ókili

ASTANA. Aqpannyń 2-si. QazAqparat /Aıdar Ospanalıev/ - «Búgingi áskerı azamattardyń mártebesi úlken kóńil bólýdi qajet etip otyr», dedi «Generaldar keńesi» respýblıkalyq qoǵamdyq birlestigi Prezıdıýmy tóraǵasynyń orynbasary, general Tursyn Aıjolov.

Bul týraly ol búgin «Áskerı qyzmetkerlerdiń quqyqtary men zańdy múddelerin qorǵaý» atty jınaqtyń tanystyrylymy barysynda málim etti, dep habarlaıdy QazAqparat.

Onyń osy máselege baılanysty áskerıler arasynda júrgizilgen saýalnama nátıjelerine súıene otyryp aıtqan sózderine qaraǵanda, qazir eldegi áskerı azamattardyń 25 paıyzy urpaqtarynyń ózderiniń jolyn jalǵastyrýyn qalamaıdy. «Óıtkeni elde ásker salasynda júrgen azamattardyń áleýmettik jaǵdaılary kóńil toltyrarlyqtaı emes. Al bizde kezinde birneshe urpaǵy ásker salasynda qyzmet etetin dástúr bolǵan jáne ol óte mártebeli is edi», dedi tóraǵanyń orynbasary.

Onyń sózine qaraǵanda, osyndaı kemshilikterdiń saldarynan eldegi birqatar áskerı shendiler basqa qurylymdarǵa, keı jaǵdaıda tipti ásker salasyna múldem qatysy joq saladan qyzmet izdeýge

májbúr. «Keshe ǵana Memleket basshysy Joldaýynda kúsh-qýat qurylymdarynyń qyzmetinde qoǵamdyq baqylaý, parlamenttik baqylaýdyń bolýy qajettigin atap kórsetti. Sondyqtan qazir osy tektes máselelerge «Generaldar keńesi» respýblıkalyq qoǵamdyq birlestigi sııaqty uıymdar da atsalysýy qajet degen oıdamyn», dedi T.Aıjolov.