Áskerge shaqyrylatyn 300 myńǵa jýyq azamattyń 40 myńynyń ǵana densaýlyǵy jaramdy
«Búgingi depýtattyq saýalǵa urpaq tárbıesinde, bizdiń pikirimizshe, áli de tıisti deńgeıde júrgizilmeı jatqan, nazarsyz qalyp qoıǵan kúrdeli másele sebep bolyp otyr. Ol - balalarymyzǵa áskerı-patrıottyq, otanshyldyq rýhta berilýge tıis tárbıe. Tárbıe tamyry ulttyq rýhanı qundylyqtarmen, otanshyl sezimmen sýarylǵan bala ǵana erteń memlekettiń qaýipsizdigine, Táýelsizdigine alańdaıtyn, Otanynyń bolashyǵy úshin jaýapkershilikti moınyna ala biletin azamat bolyp ósedi. Ásker qatarynda bilimdi, bilikti sarbaz bolady. Qoǵam múddesin bárinen bıik qoıatyn memlekettik qyzmetker bolady. Otandy qorǵaý-árbir Qazaqstan azamatynyń abzal boryshy. Ol eń aldymen, otnashyldyqtan, áskerı-patrıottyq tárbıeden bastalady», - dedi senator.
Onyń atap ótýinshe, álemde bolyp jatqan saıası-ekonomıkalyq daǵdarys, pandemııa jaǵdaıy buǵan deıin toqtatýǵa múmkin emes bolyp kóringen jahandaný úderisine tejeý boldy. Ár memleket búginde ishki máselelerine, ásirese bilim, ǵylym, medıtsına, mádenıet, urpaq tárbıesine, qaýipsizdik pen qorǵanys salasyna erekshe mán bere bastady.
«Osy oraıda, bizdiń memlekettiń de áskerı- patrıottyq tárbıede zaman suranysyna saı óz kózqarasy men óz pedagogıkalyq, sondaı-aq, bolashaq sarbaz tárbıeleýdegi metodıkalyq tól tásilderi qalyptasýy kerek dep oılaımyz. Búgingi kúni jyl saıynǵy əskerı qyzmetke shaqyrylýǵa jatatyn azamattardyń sany 300 myńǵa jýyq bolsa, sonyń 40 myńynyń ǵana densaýlyǵy áskerı boryshyn óteýge jaramdy. Ásker qataryna shaqyrý qaǵazyn alǵan azamattardyń 25,4 paıyzy áskerı qyzmetke psıhologııalyq jáne moraldyq turǵyda daıyn emes. Áskerı qyzmetke shaqyrylýdan jaltarý máselesi áli de kún tártibinen túsken joq. Al, Úkimetke Prezıdent Qasym-Jomart Toqaev Qazaqstan áskeriniń bedelin kóterý jóninde naqty tapsyrma bergen bolatyn. Osy oraıda aıtarymyz: bul jumysty nátıjeli júrgizý úshin birneshe memlekettik organ jumylý kerek. Qorǵanys, Aqparat jáne qoǵamdyq damý, Bilim ján ǵylym, Mádenıet jáne sport mınıstrlikteri kúsh biriktirý qajet», -dedi ol
Senatordyń aıtýynsha, nasıhat jumysy aıasynda áskerı-patrıottyq rýh, mádenıet pen ulttyq tarıhty, ult batyrlaryn, óz kásibiniń sheberi bolǵan otandyq tulǵalardy nasıhattaıtyn habarlar, fılmder túsirilip, kitaptar shyǵarylyp, ınternet-kontent jasalýy tıis. Mundaı kontenttiń qaralymy kóp, taralymy keń bolýy úshin onyń kórermenge usyný formasy da sapasy da zamanǵa saı bolýy kerek.
«Saýalymyzdyń eń mańyzdy tusy: áskerı-patrıottyq tárbıe máselesi qoldanystaǵy zańnamada bekitilmegendigi. «Qazaqstan Respýblıkasynyń qorǵanysy jáne Qarýly Kúshteri týraly», sondaı-aq «Áskerı qyzmet jáne áskerı qyzmetshilerdiń mártebesi týraly» zańdarynyń eski, 1993 jylǵy redaktsııalarynda tapsyrma retinde bekitilgen edi. Alaıda, zańdardyń jańa redaktsııasynda bul tapsyrmalar, zańǵa táýeldi normatıvtik quqyqtyq aktilerdiń deńgeıine túsirilgen. Osyǵan oraı, áskerı-patrıottyq tárbıe berý jumystaryn júrgizýdi memlekettik organdardyń basty tapsyrmalarynyń biri retinde zańnamalyq turǵyda bekitý, olardyń óz-ara jumystaryn úılestirý jáne nasıhattaý jumystarynda zamanaýı aqparat quraldaryn belsendi paıdalaný máselelerin qarastyrýlaryńyzdy suraımyn», - dedi Nurjan Nursıpatov.