Áskerge shaqyrýdan bosatylý nemese keıinge qaldyrý úshin ne isteý kerek – ShQO mamandary keńes beredi

Eger belgili bir sebeptermen áskerge shaqyrýdan bosatylyp nemese keıinge qaldyrǵyńyz kelse HQKO-ǵa barý shart emes. «Azamattarǵa arnalǵan úkimet» korporatsııasynyń Shyǵys Qazaqstan oblystyq fılıalynyń mamandary halyqqa bul qyzmetti qalaı onlaın alýǵa bolatynyn eske saldy, dep habarlaıdy QazAqparat tilshisi.

Áskerge shaqyrýdy keıinge qaldyrý memlekettik qyzmeti Halyqqa qyzmet kórsetý ortalyǵy arqyly da, onlaın túrinde de kórsetiledi. Osylaısha, jas azamattar úıden shyqpaı-aq elektrondy úkimet portaly arqyly ótinish bere alady.

Qyzmetti alý úshin portalda avtorızatsııadan ótip, «Qaýipsizdik» bólimindegi «Shaqyrýdy keıinge qaldyrýdy usyný» qyzmetin tańdaý qajet. Budan ári usynylǵan jáne qosymsha joldardy toltyrý, keıinge qaldyrý nemese bosatý sebebin kórsetý, qujattardyń elektrondy kóshirmelerin júkteý jáne ETsQ kómegimen ótinishke qol qoıý qajet. Ótinim 6 kún ishinde qaralady. Memlekettik mekemeniń jaýaby elektrondy portaldyń jeke kabınetine túsedi.

«Osy jyly oblys turǵyndarynyń áskerı qyzmetten bosatylýy nemese keıinge qaldyrylýy týraly mártebesin SMS-habarlama arqyly bilýge múmkindikteri bar. Bul proaktıvti memlekettik qyzmet azamattardyń ýaqytyn aıtarlyqtaı únemdeıdi. Olarǵa artyq qujattardy usynýdyń qajeti joq», - deıdi «Azamattarǵa arnalǵan úkimet» korporatsııasynyń Shyǵys Qazaqstan oblysy boıynsha fılıal dırektory Azamat Esembýlov.

Aıta keteıik, áskerge shaqyrýdy keıinge qaldyrý kelesi sebepter boıynsha qarastyrylǵan:

- otbasylyq,

- oqýdy jalǵastyrǵan jaǵdaıda,

- densaýlyǵyna baılanysty.