Áskerde júrip komaǵa túsken sarbaz isi: Qorǵanys mınıstrligi málimdeme jasady
"Merzimdi qyzmettiń áskerı qyzmetshisi Erbaıan Muhtardyń jaraqat alǵany týraly BAQ pen áleýmettik jelilerde taratylǵan aqparatqa qatysty mynany túsindiremiz. Qatardaǵy jaýynger Erbaıan Muhtar QR Іshki ister mınıstrliginiń Ulttyq ulan bólimshesinde merzimdi áskerı qyzmet atqardy. Merzimdi qyzmettiń sarbazdary Ulttyq qaýipsizdik komıtetiniń Shekara qyzmetinde, Іshki ister mınıstrliginiń Ulttyq ulanynda, Memlekettik kúzet qyzmetinde jáne Tótenshe jaǵdaılar mınıstrliginde qyzmet ótkeretinin habarlaımyz. Qorǵanys mınıstrligi atalǵan kúshtik qurylymdardaǵy áskerı qyzmettiń qaýipsizdigin baqylaýdy júzege asyrmaıdy" delingen habarlamada.
Sondaı-aq, Otan aldyndaǵy boryshyn óteı júrip, densaýlyǵyna nuqsan kelgen Erbaıan Muhtarǵa Qorǵanys mınıstrligi vedomtsvonyń emdeý mekemelerinde medıtsınalyq kómek kórsetýge daıyn ekenin málimdegen.
"Áskerı qyzmetshilerdiń ómiri men densaýlyǵyn saqtaý komandırler úshin basty mindet bolyp tabylady. Biz de Erbaıan Muhtardyń týystary men jaqyndarymen birge onyń densaýlyǵyna alańdaımyz jáne QR Qorǵanys mınıstrliginiń emdeý mekemelerinde medıtsınalyq kómek kórsetýge daıynbyz" dep jazǵan QR QM baspasóz qyzmeti.
Aıta keteıik, buǵan deıin áskerde júrip, bas jaraqatyn alǵan qatardaǵy jaýynger Erbaıan Muhtar 6 aıdan beri komada jatqany týraly jazǵan edik.
Ulttyq ulannyń habarlaýynsha, qatardaǵy Erbaıan Muhtardyń bas jaraqatyn alý faktisi boıynsha QR QK 440-baby 4-tarmaǵynyń 3-bóligine saı qylmystyq is qozǵalǵan. Bul jerde áskerı qyzmetshiler arasyndaǵy ózara qarym-qatynastardyń jarǵylyq erejeleri buzylǵan.