Áskerde adam ólimi azaıdy ma
Resmı málimetke sáıkes, sońǵy alty aıda ótken jyldyń dál osy kezeńimen salystyrǵanda áskerdegi qylmystardyń sany 28 protsentke azaıdy. Byltyr qańtar-maýsym aılarynda 343 qylmys oryn alsa, bıylǵy alty aıda 248 quqyq buzýshylyq tirkelgen. Sonyń ishinde ákimshilik quqyq buzýshylyqtar 45 protsentke (170-ten 94-ke deıin), áskerılerdiń ólimi 24 protsentke (46-dan 35-ke deıin), jaraqat alý 16 protsentke (1085-ten 910-ǵa deıin) azaıdy. Al qadaǵalaý aktileri arqyly turǵyn úı, ótemaqy jáne kommýnaldyq máselelerge qatysty 7 myń áskerı qyzmetkerdiń áleýmettik quqyǵy qorǵaldy.
Bas prokýror Qaırat Qojamjarovtyń aıtýynsha, atalǵan jumys startegııalyq mańyzǵa ıe. Sebebi osy saladaǵy zańnyń ústemdigi memlekettiń áskerı qaýipsizdigi men qorǵanysyn kúsheıtedi. Osy oraıda Bas áskerı prokýror áskerı múlikti satyp alý salasyndaǵy urlyqqa jol bermeı, álimjettik sııaqty máselelerdi únemi qadaǵalap otyrýy tıis.
Aıta keteıik, búgingi alqa májilisinde QR Bas prokýrory Qaırat Qojamjarov qylmystyq saıasatty gýmanızatsııalaý sharalary týraly aıtyp berdi. Onyń sózine qaraǵanda, aldaǵy ýaqytta 5 myńǵa jýyq sottalǵan adam bosatylýy múmkin.
Al Quqyq qorǵaý akademııasynyń rektory Erǵalı Merzadınov atalǵan oqý ornynyń kemshin tustaryn jarııalady. Onyń sózine qaraǵanda, akademııa qyzmetkerleriniń kásibı daıyndyǵyn jan-jaqty tekserip shyǵý kerek. Sebebi mamandardyń aýysýy jıilep ketti. Úsh jyldyń ishinde atalǵan kórsetkish 60 protsentti qurady.
"Eńbek tártibi osal. Árbir ekinshi qyzmetker "bolnıchnyıda" júrdi. Al keıbir qyzmetkerler bir jylda eki ret emes, 8-10 ret "aýyryp" shyǵady. Bunyń barlyǵy kúndelikti nársege aınaldy. Sosyn akademııada úsh jyl istese de, kiretin esikti de bilmeıtin qyzmetkerler bar", - dep atap kórsetti E.Merzadınov.
Onyń oıynsha, "Bolashaq" baǵdarlamasyn ózgertý kerek.