Asker Pırıev: Eń bastysy - keleshek úshin el bolyp sheshim qabyldaımyz

NUR-SULTAN. QazAqparat - Nur-Sultan qalalyq «Ahyska» túrik etnomádenı ortalyǵynyń tóraǵasy Asker Pırıev 9 maýsymda ótetin kezekten tys saılaýǵa qatysty óz pikirin bildirdi, dep habarlaıdy QazAqparat tilshisi.

«Keshe ǵana kezekten tys saılaý ótetini týraly úndeý jarııalanǵannan keıin qoǵamda ártúrli pikirler aıtylyp jatyr. Bul da demokratııalyq qoǵamnyń bir belgisi ekenin kórip otyrmyz. Sebebi, bul - eldiń taǵdyry, keleshegi. Ártúrli pikirler bolýy múmkin, bolýy da tıis. Eldiń bolashaǵyna úmit artatyn óz azamattarymyzdyń ishinen halqymyz birin tańdaıdy. El ishindegi sońǵy jańalyqtardy basqa eldermen salystyryp jatqandar da joq emes. Biraq, ár memlekettiń ózindik taǵdyry men tarıhy, qalyptasý qaǵıdaty bar. Sol sebepti, basqa eldermen salystyrý - asa qajet emes. Bizdiń tarıhymyzda bolyp jatqan jáne bolatyn nárseler tek bizge qatysty ekenin aıta ketken jón. Eń mańyzdysy - 9 maýsymda el bolyp, saılaýǵa atsalysyp, keleshektiń múddesi úshin sheshim qabyldaımyz degen senimdemiz», - dedi Asker Pırıev elordada ótken QHA keńeıtilgen otyrysy aldynda QazAqparat tilshisine.

Eske sala ketsek, aǵymdaǵy jyldyń 9 maýsymynda elimizde kezekten tys prezıdent saılaýy ótedi. Bul týraly respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty. Memleket basshysynyń Qazaqstan halqyna joldaǵan úndeýiniń tolyq mátinin myna siltemeden oqýǵa bolady.