Ásker kórgen bala erteń ata-anaǵa masyl bolmaıdy – Májilis depýtaty

NUR-SULTAN. QazAqparat – Prezıdent Joldaýyndaǵy áskerı boryshtyń jastardyń ómirindegi ornyn nyǵaıtý týraly bastamasy zaman talabynan týyndap otyr. QR Parlamenti Májilisiniń depýtaty, Qazaqstan Ardagerleri qaýymdastyǵynyń tóraǵasy Baqytbek Smaǵul osyndaı pikir bildirdi, dep habarlaıdy QazAqparat tilshisi.

«Otandy qorǵaý – Ata zańymyzdyń 36-baby boıynsha, árbir er azamattyń paryzy da, qaryzy da. Biraq biz osy mindetti laıyqty atqaryp júrmiz be? Qazirgi jastar «áskerge barsam» degen baǵytta emes, kerisinshe, «áskerden qalsam» degen baǵytta júr. Kóbiniń oıy áskerı bılet tek jumysqa turý úshin kerek degenge saıady. Qazirgi almaǵaıyp kezeńde mektep qabyrǵasyndaǵy alǵashqy áskerı daıyndyq pániniń rólin kóterý kerek. Uldarymyzdy azamat retinde qalyptastyratyn quraldyń biri osy. Qazirgi «Jas sarbaz» jobasy da óte kerek. Kelisimshart boıynsha qyzmet etetin áskerılerdiń kóbi qazir armııaǵa baryp, sol jerden qalyp jatyr. Soǵan balans ustaý úshin mektep qabyrǵasynda áskerı bilim men tárbıeni sińirý mańyzdy», - dedi depýtat Ulttyq akademııalyq kitaphanada ótken baspasóz konferentsııasynyń aldynda BAQ ókilderine bergen suhbatynda.

Qazaqstan Ardagerleri qaýymdastyǵynyń tóraǵasy áskerı boryshyn óteýden jaltarý jaıttarymen ushyrasyp turatynyn aıtady.

«Keıde maǵan tanystar qońyraý shalady. «Balamdy áskerge shaqyryp jatyr edi, alyp qalýǵa bolmaı ma» dep ótinip aıtatyndar bar. Men olarǵa kerisinshe áskerge barý balanyń óz bolashaǵy úshin kerek ekenin túsindiremin. Áskerge baryp kelgen bala erteń ata-anaǵa masyl bolmaıdy. Jigitke jigittik sıpat beretin de ásker. Ol ómirden óz júgin kóterip óte alady. Áskerge barǵan qaı bala bolsyn, jemqorlyqtan ada, otanyn súıetin adam bolyp shyǵady. Jyraqta júrip ata-anasynyń, týǵan ólkesiniń qadirin jete túsinedi. Saıası saýattylyq ta áskerde qalyptasady. Áskerde qarý atýdan basqa da kóp dúnıe úıretiledi óıtkeni. Osy turǵydan alǵanda Prezıdentimiz Qasym-Jomart Toqaevtyń jastarǵa ómirdegi óz ornyn armııa qatarynda júrip tabatyndaı jaǵdaı jasaý týraly bastamasy óte oryndy dep oılaımyn», - degen Baqytbek Smaǵul bul iste ardagsherlerdiń memleketpen qanattasyp jumis isteı alatynyn eske saldy.

«Oǵan bizdiń aýǵan soǵysynyń ardagerleri tiri úlgi retinde úles qosýǵa daıyn. Elimizde tuńǵysh ret «Ardagerler týraly» zańnyń qabyldanǵanyna da kóp bolǵan joq. Osy turǵydaǵy jumystar jalǵasyn tapsa, áskerı boryshyn abyroımen oryndaǵan azamattar laıyqty qurmet kórip jatsa, salaǵa degen qoǵamnyń kózqarasy, jastardyń áskerı boryshyn óteýge degen yntasy artady», - dedi Májilis depýtaty.