Asqar Jumaǵalıev Nıderland Koroline senim gramotalaryn tapsyrdy
QR Syrtqy ister mınıstrliginen málim etkendeı, rásimnen keıin «Nordeınde» saraıynda dıplomattyń monarhpen ekijaqty kezdesýi ótti, onyń barysynda taraptar Qazaqstan men Nıderland arasyndaǵy saıası, saýda-ekonomıkalyq yntymaqtastyqty odan ári nyǵaıtýǵa baǵyttalǵan basym máselelerdi talqylady.
A.Jumaǵalıev Vıllem-Aleksandrǵa Qazaqstannyń qazirgi syrtqy saıasatymen jáne ekonomıkalyq bastamalarymen tanystyrdy. Ol sondaı-aq Prezıdent Qasym-Jomart Toqaev Nıderlandpen keshendi yntymaqtastyqty damytýǵa úlken mán beretinin jáne joǵary deńgeıdegi baılanystar eki el arasyndaǵy senimdi dıalogtyń berik negizin qalaǵanyn atap ótti.
«Óz kezeginde Korol Vıllem-Aleksandr eki el arasyndaǵy yntymaqtastyqtyń joǵary deńgeıin aıryqsha ataı otyryp, Nıderland Qazaqstanmen saıası jáne ekonomıkalyq baılanystardy odan ári órbitýge múddeli ekenin belgilep ótti. Ol sondaı-aq 2014 jylǵy naýryzda Gaagadaǵy ıAdrolyq qaýipsizdik sammıti aıasynda Qazaqstan Respýblıkasynyń Tuńǵysh Prezıdenti Nursultan Nazarbaevpen kezdesýin eske túsirdi. Dıplomat Elbasynyń sol Forýmda sóılegen sózinde Qazaqstannyń ıadrolyq synaq polıgonyn birinshi bolyp jaýyp, sonymen qatar ıadrolyq qarýdan erikti bas tartqany týraly aıtqany týraly qosty. Osyǵan oraı, ol 2021 jyly N. Nazarbaevtyń álemdegi eń iri Semeı ıadrolyq synaq polıgonyn jabý arqyly qaýipsiz jáne ornyqty álemniń qalyptasýyna erekshe úles qosqan tarıhı sheshiminiń 30 jyldyǵy atap ótiletindigi týraly habarlady», - delingen aqparatta.