Asqar Jumaǵalıev: «Internet arqyly jer bólý» jobasyn óńirlerge engizýge daıynbyz

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev «Internet arqyly jer bólý» jobasyn óńirlerge engizýge daıyn ekenin málim etti, dep habarlaıdy QazAqparat tilshisi.

«Memleket basshysynyń jer qatynastaryn tsıfrlandyrý jónindegi tapsyrmasyna sáıkes «Jyljymaıtyn múliktiń biryńǵaı memlekettik kadastry» aqparattyq júıesin qurý jumystary aıaqtaldy. Qazirgi tańda júıe - «Internet arqyly jer bólý» pılottyq jobasyn iske asyrýdyń negizgi bóligi. Búgingi kúni joba Aqtóbe qalasynda pılottyq rejımde jumys isteı bastady. Sonymen qatar jergilikti atqarýshy organdardyń geoportaldary 100% daıyn bolsa qalalar men aımaqtarda pılottyq jobany bastaýǵa daıynbyz», - dedi Asqar Jumaǵalıev Úkimet otyrysynda.

Mınıstrdiń aıtýynsha, ákimdikter Aýyl sharýashylyǵy mınıstrligimen birlesip geoportaldardyń tehnıkalyq daıyndyǵyn qamtamasyz etip, pılottyq jobalardy iske asyrýy qajet.

«Onlaın arqyly jer berýdi bastaý úshin Qarjy mınıstrligi «Memlekettik tirkelimniń» elektrondyq saýda alańyn elektrondyq úkimet portalymen jáne Biryńǵaı memlekettik jyljymaıtyn múlik kadastrymen biriktirýdi qamtamasyz etýi kerek. Jobanyń mańyzdylyǵyn eskere otyryp, tez arada atalǵan sharalardy iske asyrýdy suraımyz», - dedi ol.