Asqar Jaldınov «5:32» serıaly boıynsha sotta jeńip shyqty

ASTANA. QazAqparat – «Protokoldan tys. Qazaqstandaǵy atyshýly qylmystar qupııasy» kitabynyń avtory Asqar Jaldınov pen «5:32» serıalyn túsirýshiler arasynda qozǵalǵan is boıynsha sot sheshimi shyqty, dep habarlaıdy QazAqparat tilshisi Almaty qalasy sotynyń baspasóz qyzmetine silteme jasap.

Talapker belgili veb-serıalǵa stsenarıı jazý kezinde onyń kitabyn paıdalaný faktisin negizge ala otyryp, kópshilik aldynda tanýǵa májbúrleý jáne 15 000 AEK mólsherinde avtorlyq quqyqty buzǵany úshin ótemaqy jáne 3 mln teńge moraldyq zııandy óteý týraly talap aryzben sotqa júgindi.

Sot jaýapkerlerdiń veb-serıal stsenarııi talap qoıýshynyń kitabynda kórsetilgen oqıǵalarǵa súıenip jazylǵanyn anyqtady. Jaýapkerler bul faktini joqqa shyǵarmaı, talapkerdiń kitaby elimizde ártúrli ýaqyt aralyǵynda bolǵan naqty qylmystarǵa negizdelgenin alǵa tartyp, QR QK 974-babynyń talaptaryna sáıkes avtorlyq quqyqtyń buzylýyn moıyndamady. QR Azamattyq kodeksi boıynsha aqparattyq sıpattaǵy oqıǵalar men faktiler avtorlyq quqyq obektisi bolyp sanalmaıtynyn jáne talapker olardy monopolııalaı almaıtynyn ýáj etti. Osyǵan baılanysty olar sottan talap aryzdy tolyǵymen qanaǵattandyrýsyz qaldyrýdy surady.

Sot taraptardyń barlyq ýájderin muqııat taldap, kýálardy tyńdady. Nátıjesinde saraptamalyq qorytyndylardy zerdelep, sheshimge keldi.

Talapker bul kitapty jazý kezinde ІІM men respýblıka sottarynyń muraǵattaryn, qylmystyq ister materıaldaryn zerdeleý boıynsha belgili bir jumys júrgizgen. Sondaı-aq, qylmystardy ashýǵa tikeleı qatysqan burynǵy quqyq qorǵaý organdarynyń qyzmetkerleriniń estelikterin avtorlyq ınterpretatsııany qoldana otyryp paıdalanǵan. Atalǵan áreketterdi eskere otyryp, sot kitap – shyǵarmashylyq jumystyń nátıjesi degen qorytyndyǵa keldi.

QR Azamattyq protsestik kodeksi 972-babynyń 3-tarmaǵyna sáıkes avtorlyq quqyq obektilerine:

1) týyndy shyǵarmalar (aýdarmalar, óńdeýler, annotatsııalar, referattar, túıindeýler, sholýlar, ınstsenırovkalar, mýzykalyq aranjırovkalar jáne ǵylym, ádebıet pen óner týyndylarynyń basqa da qaıta óńdelimderi);

2) jınaqtar (entsıklopedııalar, antologııalar, derekter bazalary) jáne basqa da iriktelý jáne (nemese) materıaldardyń ornalasýy boıynsha shyǵarmashylyq eńbek nátıjesi bolyp sanalatyn qurastyrylǵan týyndylar jatady.

Týyndy jáne qurastyrylǵan shyǵarmalar olarǵa negiz bolǵan nemese olar qamtyǵan shyǵarmalardyń avtorlyq quqyq obektileri bolý-bolmaýyna qaramastan avtorlyq quqyqpen qorǵalady.

Sot otyrysynda talapker QR APK 72-babyna sáıkes jaýapkerlerdiń ózine tıesili quqyqtardy zańsyz paıdalaný faktisin jetkilikti dárejede dáleldedi. Al, jaýapkerler avtorlyq quqyq obektisine qatysty jasaǵan áreketteriniń zań talaptaryna sáıkes keletindigin jáne avtordyń quqyǵyn buzbaǵandyǵyn dáleldeı almady.

Avtorlyq quqyq obektisi bolyp sanalatyn talapkerdiń kitabyn jaýapkerler jazbasha stsenarıı túrinde avtordyń kelisiminsiz paıdalanǵandyqtan, sáıkesinshe talapkerdiń jaýapkerlerge avtorlyq quqyqtyń buzylǵany úshin ótemaqy óndirý týraly talaptaryn sot negizdi dep sanap, qanaǵattandyrýǵa jatady dep tanydy.

Sot barlyq mán-jaılardy eskere kele, parasattylyq pen ádilettilik qaǵıdattaryna súıene otyryp, talapty ishinara qanaǵattandyrdy. Sondaı-aq, jaýapkerlerge kitapty paıdalaný faktisin atalǵan serıaldyń kredıtterinde qosyp, kópshilik aldynda moıyndaýǵa mindettedi.

Jaýapkerlerden talapker paıdasyna 1 000 AEK kóleminde ótemaqy jáne 1 mln teńge moraldyq zalal, sonymen qatar sot shyǵyndary óndirildi. Al, talap aryzdyń qalǵan bóligi qanaǵattandyrýsyz qaldyryldy.

Sot sheshimi zańdy kúshine engen joq.

Eske salsaq, byltyr tamyzda Asqar Jaldınov «5:32» serıalyn túsirgenderdi sotqa bergen edi.

Sondaı-aq, «5:32» serıalyn túsirgen Salem social media kompanııasy Asqar Jaldınovtyń málimdemesine jaýap berdi.