Asqar Myrzahmetov elimizde qansha sút jınaıtyn beketter ashylatynyn aıtty

ASTANA. QazAqparat - QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov aýyldyq jerlerde jumys oryndaryn qurýdyń jospary týraly aıtyp berdi, dep habarlaıdy QazAqparat.

«Bul másele aýyl sharýshalyǵy salasy úshin ózekti ekeni túsinikti. Óıtkeni, qosalqy sharýashylyqtarda ózin-ózi jumyspen qamtamasyz etken adamdardyń sany 675 myńdy qurap otyr. Ekinshi jaǵynan alyp qaraǵanda, mal sharýashylyǵy ónimderi boıynsha et pen sút birinshi kezekte tur jáne sonyń 70-80 paıyzy osy qosalqy sharýashylyqtarda óndirilip otyr. Al endi bul óndirilgen ónimniń tıimdiligi qandaı? Árıne, tıimdilik deńgeıi óte tómen. Sebebi, ol ónimdi daıyndaý, óńdeý sharalary, sondaı-aq satýshylarǵa jetkizý, ıaǵnı logıstıka máselesi sheshilmegen»,-dedi Myrzahmetov Senatta ótken «QR Prezıdentiniń 2015 jylǵy 30 qarashadaǵy Joldaýy aıasynda Jumyspen qamtý jol kartasyn quqyqtyq qamtamasyz etý sharalar týraly» taqyrybynda ótip jatqan dóńgelek ústel otyrysynda.

Osy rette ol elimizde aýyl sharýashylyǵy ónimderin óńdeıtin kásiporyndardyń júktemesi respýblıka boıynsha ortasha eseppen 60 paıyzdy qurap otyrǵandyǵyn jetkizdi. Al, keıbir zaýyttardyń júktemesi 10 paıyzǵa da jetpeıdi.

«Bul eki máseleni birimen birin ushtastyra otyryp, saladaǵy sharalardy sheshýde tıisti jumystar atqarylýda. Ol úshin arnaıy úshjyldyq jospardy qurdyq. Onyń aıasynda shilde-tamyz aılarynda jumys toptaryn jasaqtap, óńirlerge jiberdik»,-dep toqtaldy Myrzahmetov.

Osy rette sútti jınaý beketteri men maldy bordaqylaıtyn shaǵyn alańdardyń jumysyn damytý sharalary qamtylmaq.

«Bizdiń jasaǵan ındıkatorymyzǵa sáıkes, 2016 jyldyń aıaǵyna deıin 150 aýyl sharýashylyǵy koperatıvterin ashý, 100-ge jýyq sút qabyldaıtyn beketterdi iske qosýdy jáne 2 200-ge tarta otbasylyq mal alańshalaryn ashýdy alǵashqy kezde josparlanǵan bolatynbyz. Keıin ónimderdi qaıta óńdeıtin kásiporyndardyń tarapynan qyzyǵýshylyqtyń artýyna baılanysty ındıkatorlardy qaıta qarap shyqtyq. Búgingi tańda qarjyny ıgerý 1 sáýirge deıin bolǵan soń, osy merzimge deıin soza otyryp, ındıkatorlardy kóbeıttik. Endi qurylatyn koperatıvterdiń sany 150-den 250-ge, sút jınaıtyn beketter 100-den 225-ke, al bordaqylaý alańshalary 2 200-den 4 300-ge deıin artyp otyr. Bul qanatqaqty joba retinde bıyl barsha óńirde bastalatyn ındıkatordyń sıpattamasy osyndaı»,-dedi Myrzahmetov.

Úshjyldyq josparǵa sáıkes, 200 myńnan astam qosalqy sharýashylyqtar qamtylmaq, sondaı-aq 70 myńnan astam jańa jumys oryndary qurylady dep kútilýde.