Asqar Mamınge «Báıterek» ǵarysh jobasynyń iske asyrylýy týraly baıandaldy
A. Mamın «Báıterek» qazaqstandyq-reseılik jobasyn iske asyrý barysy týraly esepti tyńdady, onyń aıasynda Baıqońyr ǵarysh aılaǵyndaǵy jerdegi ǵarysh ınfraqurylymyn jańǵyrtý josparlanǵan. Atap aıtqanda, «Zenıt» ǵarysh zymyran keshenin. Sondaı-aq, «Baıqońyr» kesheni nysandaryn paıdalanýǵa qatysty jumystardy atqarý jaıy baıandaldy. Bul týraly Úkimet basshysynyń saıtynda málim etildi.
2016 jylǵy jeltoqsanda QR Prezıdenti Nursultan Nazarbaevtyń Reseıge jumys sapary barysynda kelesi qujattarǵa qol qoıylǵan bolatyn: «Baıqońyr» keshenindegi aldaǵy yntymaqtastyq tujyrymdamasy jáne «1995 jylǵy 23 jeltoqsandaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly memleketaralyq Kelisimge QR memlekettik organdarynyń tizimi bóligine ózgerister engizý týraly» Hattama.
«Tujyrymdamany oryndaý «Baıqońyr» keshenin damytý boıynsha Qazaqstan men Reseı yntymaqtastyǵynyń basymdyqty baǵyttaryn eki memlekettiń múddelerine saı júzege asyrýǵa múmkindik beredi, keshenniń odan ári damýyn perspektıvaly josparlaýdy qamtamasyz etedi, sondaı-aq jańa ortaq ǵaryshtyq jobalardy iske asyrýǵa múmkindik beredi», - dep basa aıtty A. Mamın.
Qyzylordaǵa jumys sapary aıasynda QR Premer-Mınıstriniń birinshi orynbasary «Nur orda» jańa shaǵynaýdanynda bolyp qaıtty. Munda óńirdegi turǵyn úı qurylysynyń barysy týraly esep berildi. «Óńirlerdi damytýdyń 2020 jylǵa deıingi baǵdarlamasy» boıynsha atalǵan shaǵynaýdanda 20 kópqabatty úı turǵyzylǵan.
A. Mamın óńirdiń basty jylýmen qamtý nysany - Qyzylorda JEO-nyń jumysymen tanysyp, atalǵan nysandy jańǵyrtýǵa baılanysty baıandamany tyńdady.
Sondaı-aq, Qazaqstandaǵy alǵashqy tabaq shyny óndiretin zaýyttyń qurylys alańyna bardy. Kásiporyn bıylǵy jyldyń ekinshi toqsanynda paıdalanýǵa beriletin bolady. Munda jylyna 200 myń tonna tabaq shyny, energııa únemdeýshi, kúnnen qorǵaıtyn jáne kópfýnktsııaly shyny shyǵarý josparda bar.
Sondaı-aq, A. Mamın Syrdarııa ózeniniń sol jaǵalaýyndaǵy jańa kópirdi qarap shyǵyp, sol jaq jaǵalaý aımaǵynyń qurylys jobasymen tanysty.
Jumys saparynyń qorytyndysy boıynsha QR Premer-Mınıstriniń birinshi orynbasary Qyzylorda oblysyn damytý máseleleri jóninde keńes ótkizdi. Keńes barysynda óńir ákimi Q. Kósherbaev baıandama jasady. Ol 2016 jyldaǵy óńirdiń áleýmettik-ekonomıkalyq damý qorytyndylary men 2017 jyly oblysty damytý perspektıvalary týraly esep berdi.