Asqar Mamın josparly kórsetkishterdi oryndamaǵan ákimderge tapsyrma berdi
«Memleket basshysy Qazaqstan halqyna Joldaýyn jarııalady. Onda Elbasy saıasatynyń sabaqtastyǵy kórinis taýyp, Úkimetke ekonomıkany odan ary damytýǵa baǵyttalǵan birqatar negizgi mindetter belgilengen. Jalpy ishki ónimniń jyl saıynǵy ornyqty ósimin qamtamasyz etip, onyń 2025 jylǵa qaraı 5 paıyzǵa jetkizip, odan da joǵarylatý Úkimettiń negizgi mindeti bolyp sanalady. Baıandamalarda aıtylǵandaı bıylǵy qańtar-tamyzda JІÓ byltyrǵy jyldyń osy kezeńimen salystyrǵanda 4,3 paıyzǵa ósti», - dedi Úkimet otyrysyn qorytyndylaǵan Úkimet basshysy.
Onyń dereginshe, qurylysta 11,8, saýda-sattyqta 7,6, kólik salasynda 5,5, óńdeýshi sektorynda, onyń ishinde mashına jasaýda 18, jeńil ónerkásipte 17, tústi metall 17,9, munaı óńdeýde 6,2 paıyzǵa ósim baıqalyp otyr. Sonymen qatar, kómir men qara metallýrgııada ósim joq.
«Salalyq mınıstrlikterge bekitilgen nysanaly ındıkatorlardyń oryndalýyn qamtamasyz etý boıynsha jumysty kúsheıtýdi tapsyramyn. 8 aıdyń qorytyndysynda ekonomıkanyń negizgi bazalyq kórsetkishteri boıynsha Atyraý, Qaraǵandy, Qyzylorda, Túrkistan, Shyǵys Qazaqstan jáne Soltústik Qazaqstan oblystarynyń ákimdikteri jaqsy jumys júrgizgenin atap ótkim keledi. Sonymen qatar, 8 aıdyń kórsetkishterine sáıkes qurylys Aqtóbe, Batys Qazaqstan, Qyzylorda, Mańǵystaý oblystarynda, ónerkásip elordada, Shymkent qalasynda ınvestıtsııalar boıynsha josparly kórsetkishter oryndalmaı otyr. Óńirlerdiń ákimderine asa qysqa merzimde bul jaǵdaıdy túzetýge tapsyramyn»,- dedi Asqar Mamın.