Asqar Mamın Túrkistan oblysynyń jańa ákimine birqatar mindetter júktedi

TÚRKІSTAN. QazAqparat - Elimizdiń Premer-Mınıstri Asqar Mamın Túrkistan oblysynyń aktıvine jańa ákimdi tanystyra otyryp, oǵan birqatar mindetterdi júktedi. Búgingi kúnge deıin memlekettik organdarda basshylyq qyzmetter atqarǵan Ómirzaq Shókeevke jergilikti atqarýshy organdar aldynda jańa qalanyń jańǵyrýyn ýaqytyly qamtamasyz etýdi tapsyrdy, dep habarlaıdy QazAqparat tilshisi.

«Ómirzaq Shókeev Qostanaı, Ońtústik Qazaqstan oblystary men Astana qalasynyń ákimi retinde atalǵan óńirlerdiń áleýmettik-ekonomıkalyq damýyna úlken úles qosqan. Premer-Mınıstrdiń Orynbasary - Aýyl sharýashylyǵy mınıstri kezinde ózin isker, tájirıbeli basshy jáne joǵary deńgeıdegi uıymdastyrýshy retinde kórsetti. Kásibı biliktiligi men jaýapkershiligi áleýmettik mańyzdy mindetterdi sapaly oryndady. Memleket basshysy taǵaıyndaǵan jaýapty qyzmetterde Elbasy senimin aqtady. Endi Ómirzaq Estaıuly Túrkistan oblysynyń ákimi retinde Elbasy tapsyrmalaryn joǵary deńgeıde oryndaıdy dep senemiz»,-dedi Asqar Mamın.

Úkimet basshysy, sondaı-aq, Túrkistan qalasyn búkil túrki áleminiń mádenı-rýhanı astanasy retinde órkendetý jáne ony qarqyndy damytý, jumys oryndaryn ashý, azamattardyń áleýmettik jaǵdaıyn jaqsartý boıynsha jaýapkershilik júkteıtin mindetter alǵa qoıylǵanyn atap ótti. Óz kezeginde Ómirzaq Shókeev artylǵan senimdi aqtaýǵa tyrysatynyn jetkizdi.

«Qadirmendi túrkistandyqar! Men úshin búgin erekshe qýanyshty kún. Elbasynyń Jarlyǵymen men jańadan qurylǵan Túrkistan oblysyna ákim bolyp taǵaıyndaldym. Elbasy keshe ǵana Úkimettiń jańa quramyna aýqymdy mindetter júktedi. Onyń ishinde barlyq jerdegi ákimder, ártúrli deńgeıdegi úkimet músheleri óz qyzmetine jaýapty qaraýy tıistigin jáne jańa baǵdarlamalardy iske asyryp, jobalardy oryndaý ǵana emes, sol jobalardy júzege asyrýda barlyq mán-jaıdy halyqqa túsindirý jaǵyna da kóp kóńil bólý kerektigin shegelep aıtty. Men osy eldiń týmasymyn, osy jerde ónip-óstim. Budan basqa da birqatar óńirlerde jaýapty qyzmetter atqardym. Araǵa on jyl salyp, jańa oblysta óte jaýapty qyzmet atqarýǵa múmkindik bergeni úshin Elbasyna alǵysym sheksiz. Elbasy Túrkistandy rýhanı jańǵyrǵan Qazaqstannyń jańa múmkindigi dep atady. Kıeli qalany túp-tarıhymyzdyń sımvoly ekenin sóz etti. Meniń oıymsha, biz Elbasynyń Túrkistanǵa artqan senimin osynda otyrǵan qaýymmen birge aqtaýymyz kerek. Osy baǵytta ózderińizben birigip, jumylyp qyzmet isteımiz, Asqar Uzaqpaıuly. Biz de Úkimettiń qoldaýyna senemiz. Barshańyzǵa osy qyzmette abyroı, amandyq, sáttilik jáne jaqsylyq tileımin»,- dedi Ómirzaq Shókeev.