Asqar Mamın: Týǵan aýyldaryn kórkeıtý boıynsha metsenattarmen belsendi jumys júrgizý kerek
«Elbasy 2018 jyly 5 qazandaǵy Joldaýynda «Aýyl - el besigi» jobasyn júzege asyrý arqyly aýyldardyń áleýmettik-ınfraqurylymdyq áleýetin jańǵyrtý mindetin qoıdy. Bul jobamen 2025 jylǵa deıin 6,1 mln turǵyny bar 2 myńǵa jýyq eldi meken qamtylady. Aýyldyq eldi mekenderdi jańǵyrtý maqsatynda áleýmettik jáne ınjenerlik ınfraqurylymmen qamtamasyz etýdi kózdeıtin óńirlik standarttar ázirlengen. Basqarmaly ýrbanızatsııa - aýyldardyń jańǵyrtýǵa jáne turǵyndardyń turmys sapasyn arttyrýǵa jaǵdaı jasaıdy. Sondyqtan, jobalardy iske asyrý boıynsha tásilderdi maquldaýdy usynamyn. Ony tıimdi iske asyrýdy qamtamasyz etý qajet», - dedi Asqar Mamın búgingi Úkimet otyrysynda.
Premer-Mınıstr osyǵan oraı mynadaı tapsyrlamar baryn atap ótti: birinshiden ákimder jergilikti bıýdjetten birlesip, qarjylandyrýdy arttyrý múmkindigin qarastyrý kerek. Sonymen qatar, bıznestiń áleýmettik jaýapkershiligi aıasynda aýyl ınfraqurylymyn jańǵyrtýǵa qarajat tartý máselesin iri kásiporyndarmen birlesip, qarastyrý qajet.
«Týǵan aýyldaryn kórkeıtý boıynsha metsenattarmen belsendi jumys júrgizý kerek. Budan basqa árbir joba jáne árbir óńir boıynsha Jol kartasyn jasaýdy tapsyramyn. Onda iske asyrý merzimderi men jaýapty adamdardy naqty kórsetilýi tıis. Áleýmettik ınfraqurylym nysandaryn, mektepter, balabaqshalar, densaýlyq saqtaý mekemelerin jóndeý, joldardy jóndeý jumystaryn - osy jyldyń qyrkúıegine deıin aıaqtaý qajet», - dedi Asqar Mamın.
Eske sala ketsek, búgingi Úkimet otyrysynda Premer-Mınıstrdiń orynbasary Jeńis Qasymbek «Aýyl - el besigi» jobasyn iske asyrý jumystary bastalǵanyn jarııa etip, jobany júzege asyrýdyń tásilderin ataǵan bolatyn.