Asqar Mamın «RTJ» AAQ bas dırektorymen kezdesti

NUR-SULTAN. QazAqparat - QR Premer-Mınıstri Asqar Mamın «Reseı temir joldary» AAQ bas dırektory – basqarma tóraǵasy Oleg Belozerovpen kezdesý ótkizdi, dep habarlaıdy QazAqparat primeminister.kz saıtyna silteme jasap.

Taraptar temirjol kóligi jáne logıstıka salasyndaǵy yntymaqtastyqty ekijaqty formatta da, Eýrazııalyq ekonomıkalyq odaq sheńberinde de nyǵaıtý máselelerin talqylady. «Birlesken kóliktik-logıstıkalyq kompanııa – Eýrazııalyq temirjol alıansy» AQ («BKLK ERA») odan ári damytý perspektıvalary qaraldy. Atalǵan ıntegratsııalyq joba Qazaqstan, Reseı jáne Belarýs aýmaǵy arqyly «Qytaı – Eýropa» baǵyty boıynsha turaqty poıyzdar quramynda tranzıttik konteınerlik tasymaldaý qyzmetterin qamtamasyz etýge baǵyttalǵan. «Qazaqstan óziniń kóliktik-logıstıkalyq áleýetin arttyrýǵa erekshe kóńil bóledi. Temir joldardy odan ári damytý, aımaqtaǵy saýda men tranzıt kólemderin arttyrý – biz úshin óte mańyzdy jáne basym mindetter», — dedi A. Mamın.

2020 jyly pandemııaǵa qaramastan, «Qytaı – Eýropa» baǵyty boıynsha Qazaqstan aýmaǵy arqyly tranzıtpen júkterdi konteınerlermen tasymaldaý kólemi 517,5 myń JFE qurady, bul 2019 jylǵy kórsetkishten 65%-ǵa artyq. Qazaqstan men Reseı arasyndaǵy júk tasymaldaý kólemi 2020 jyly 85,6 mln tonnadan asty. Osy jyldyń I toqsanynda eki el arasyndaǵy konteınerlik tasymaldar 2020 jyldyń sáıkes kezeńimen salystyrǵanda 57%-ǵa ósti.

Kezdesýge QR Premer-Mınıstriniń orynbasary Roman Sklıar men «Qazaqstan temir joly» UK» AQ basqarma tóraǵasy Nurlan Saýranbaev qatysty.