Asqar Mamın Ortalyq Azııanyń damýy jolyndaǵy úlesi úshin EO elderine alǵys aıtty

BІShKEK. QazAqparat – Eýropalyq odaq Ortalyq Azııa óńirine 110 mlrd eýrodan astam ınvestıtsııa saldy. Bul týraly Bishkekte «Eýropalyq Odaq – Ortalyq Azııa» ekonomıkalyq forýmynda QR Úkimet basshysy Asqar Mamın málim etti, dep habarlaıdy QazAqparat tilshisi.

«Ortalyq Azııa elderi táýelsizdiginiń 30 jyldyǵyn atap ótip jatqan kezeńde osy forýmnyń uıymdastyrylýy sımvoldyq mánge ıe. Osy merzimde bizdiń elderdiń qol jetkizgen progresi ulttyq ekonomıkalardy damytý men adamdardyń ómir sapasyn kóterý turǵysynan alyp qaraǵanda shyn máninde aýqymdy bolyp otyr. Osy oraıda bul órleýdegi eleýli úles qosqan eýropalyq seriktesterge alyǵysymdy jetkizgim keledi», - dedi Asqar Mamın.

QR Úkimet basshysy sońǵy 10 jylda Eýropalyq odaqqa múshe elder óńirge 110 mlrd eýrodan astam ınvestıtsııa salǵanyn jetkizdi. Bul óz kezeginde óńirge kelip túsken tikeleı shetel ınvestıtsııasynyń jalpy kóleminen 40 paıyzǵa jýyq úlesin qurap otyr.

Budan buryn habarlanǵandaı, búgin Bishkekte Premer-Mınıstrler deńgeıinde «Eýropalyq Odaq – Ortalyq Azııa» ekonomıkalyq forýmy bastaldy.