Asqar Mamın órt qaýipsizdigin qamtamasyz etýge qatysty birqatar tapsyrma berdi
«Memleket basshysy elimizde órt qaýipsizdigin qamtamasyz etý máselelerin qarap, júıeli problemalardy sheshý boıynsha tıisti qujat qabyldaýdy tapsyrǵan bolatyn. Órt qaýipsizdigin qamtamasyz etý boıynsha ázirlenetin Jol kartasynda órt sóndirý beketterin tehnıkamen ýaqtyly qamtamasyz etý, erikti órt sóndirý quralymdaryn damytý, erikti órt sóndirýshilerge arnaıy kepildikter men jeńildikterdi ulǵaıtý máselelerin qarastyrýdy tapsyramyn»,- dedi Úkimet basshysy.
Osy rette Premer-Mınıstr adamdar kóp jınalatyn nysandardy, turǵyn úıler men bıik ǵımarattardy paıdalanýǵa bergen kezde órt qaýipsizdiginiń talaptaryn kúsheıtý is-sharalaryn qarastyrý qajettigin basa aıtty.
«Osyǵan baılanysty mynadaı tapsyrma beremin. Birinshi, Tótenshe jaǵdaılar mınıstrligine múddeli memlekettik organdarmen birge bıylǵy 20 qazanǵa deıin Premer-Mınıstr Keńsesine Órt qaýipsizdigin qamtamasyz etý jónindegi jol kartasynyń kelisilgen jobasyn engizýdi tapsyramyn. Ekinshi, óńirlerdiń ákimdikterimen birge ot jaǵý maýsymyndaǵy órt qaýipsizdigi máseleleri boıynsha turǵyndarmen profılaktıkalyq jumysty kúsheıtsin», - dedi Asqar Mamın.
Úkimet basshysy osy máselede járdem kórsetýdi Aqparat jáne qoǵamdyq damý mınıstrligine júktedi.
«Úshinshi, Indýstrııa mınıstrligi, óńirlerdiń ákimdikteri gaz jabdyǵy men turmystyq ballondardyń qaýipsiz paıdalanylýyn júıeli túrde baqylaýdy jáne talaptardy qatańdatýdy qamtamasyz etsin», - dedi Asqar Mamın.