Asqar Mamın óńirlerdegi jem-shóp jetkizý jaǵdaıyn erekshe baqylaýda ustaýdy tapsyrdy

NUR-SULTAN. QazAqparat – Premer-Mınıstr Asqar Mamın Aýyl sharýashylyǵy mınıstrligi men ákimdikterge elimizdiń batysy men ońtústigindegi óńirlerdi jem-shóp másele boıynsha qoldaýdy tapsyrdy, dep habarlaıdy QazAqparat tilshisi.

Bıylǵy jaz erekshe qurǵaq boldy, sonyń saldarynan elimizdiń batysy men ońtústiginde birqatar óńirler zardap shekti. Qurǵaqshylyqtyń saldaryn joıý úshin jedel sharalar qabyldandy. Zardap shekken óńirlerdi jem-shóppen qamtamasyz etý máselelerin sheshý úshin Jergilikti jáne ortalyq atqarýshy organdardyń qyzmetin úılestirý jónindegi respýblıkalyq jedel shtab jumys isteýde. Jem-shóp satyp alý úshin Úkimet rezervinen Mańǵystaý jáne Qyzylorda oblystaryna 3,6 mlrd teńge bólindi, jem-shóp daıyndaýǵa qosymsha 43,1 myń tonna arzan dızel otyny bólindi. Soltústik óńirlerden jem-shóp jetkizildi. Batys óńirlerdi jem-shóppen qamtamasyz etý máselesine volonterler de kiristi», - dedi A. Mamın Úkimet otyrysynda.

Onyń aıtýnysha, respýblıkadan kesek jem-shópty shyǵarýǵa jáne jemdik astyq eksportyna kvota berýge ýaqytsha tyıym salyndy. Qabyldanǵan sharalardyń arqasynda jem-shóppen qamtamasyz etý máselesi jalpy turaqtandy.

«Aýyl sharýashylyǵy mınıstrligi men ákimdikter osy baǵyttaǵy jumysty jalǵastyryp, jaǵdaıdy erekshe baqylaýda ustaýy qajet», - dedi Úkimet basshysy.