Asqar Mamın: Óńirlerde kásipkerlikti damytýǵa 50 mlrd teńge bólinedi

NUR-SULTAN. QazAqparat – Jumyspen qamtýdyń jol kartasy aıasynda iske asatyn ınfraqurylymdyq jobalar turaqty jumys oryndaryn qurýǵa baǵyttalýy kerek. Premer-Mınıstr Asqar Mamın Úkimet otyrysynda salaǵa jaýapty vedomstvoǵa osyndaı mindet júktedi, dep habarlaıdy QazAqparat tilshisi.

Úkimet basshysy byltyr jumyspen qamtýdyń jol kartasy jumyssyzdyqpen kúreste jáne halyqtyń ál-aýqatyn jaqsartý isinde joǵary tıimdilik kórsetkenin atap ótti.

«Memleket basshysy Qasym-Jomart Toqaevtyń tapsyrmasy boıynsha Jumyspen qamtýdyń jol kartasyn keńeıtý jóninde sharalar qabyldandy. Sondyqtan, bıyl jol kartasyn oryndaý sheńberinde ınfraqurylymdyq jobalardy iske asyrýǵa kásipkerlik pen agrarlyq salany damytý arqyly turaqty jumys oryndaryn qurýǵa erekshe nazar aýdarylady. Sonyń ishinde óńirlerdegi joldardy, medıtsına jáne bilim berý uıymdaryn salý jáne jóndeýge baǵyttalǵan 127,5 mlrd teńgeni quraıtyn ınfraqurylymdyq jobalar iske asyrylady», - dedi Asqar Mamın.

Sondaı-aq, bıznesti qoldaýǵa bólinetin qarajattyń basym bóligi óńirlerge baǵyttalatynyn aıtty.

«Atameken» palatasy men ákimdikter qatysatyn mıkroqarjylyq uıymdar arqyly 22,5 mlrd teńge kóleminde bıznes jobalardy qarjylandyrý josparlanǵan. Óńirlerde kásipkerlikti damytýǵa 50 mlrd teńge baǵyttalady», - dedi Premer-Mınıstr.