Asqar Mamın Omby oblysynyń gýbernatorymen kezdesti

NUR-SULTAN. QazAqparat - QR Premer-Mınıstri Asqar Mamın RF Omby oblysynyń gýbernatory Aleksandr Býrkovpen kezdesti, dep habarlaıdy QazAqparat Úkimet basshysynyń baspasóz qyzmetine silteme jasap.

Taraptar saýda-ekonomıka, ónerkásiptik kooperatsııa, AÓK, energetıka, tranzıttik-kólik, týrızm, mádenı-gýmanıtarlyq salalardaǵy QR men RF shekara mańy yntymaqtastyǵynyń ózekti máselelerin talqylady. Kelissóz barysynda Ertis transshekaralyq ózeninde keme qatynasyn damytý máselelerine erekshe nazar aýdaryldy. Pavlodar men Omby qalalary arasyndaǵy ózen boıynsha júk tasymaldaý kólemin 2025 jylǵa qaraı 4 esege arttyryp, jylyna 1 mln tonnaǵa deıin jetkizý josparlanyp otyr. Buqtyrma, Óskemen jáne Shúlbi keme qatynasy shlıýzderine júrgizilip jatqan kúrdeli jóndeý jumystary Ertis ózeni boıynsha ótpeli keme qatynasyn ashýǵa jáne keleshekte QHR-men mýltımodaldyq qatynastyń ashylýyna yqpal etetin bolady. Qazaqstan — RF Omby oblysynyń iri saýda-ekonomıkalyq seriktesi. 2021 jylǵy qańtar-shilde aılarynda taýar aınalymy $192,3 mln qurady, bul ótken jyldyń sáıkes kezeńindegi kórsetkishten 26,6%-ǵa joǵary.