Asqar Mamın men Ómirzaq Shókeev aǵash otyrǵyzý boıynsha respýblıkalyq aktsııany bastap berdi

TÚRKІSTAN. QazAqparat – Túrkistan oblysyna jumys sapary barysynda QR Premer-Mınıstri Asqar Mamın men aımaq basshysy Ómirzaq Shókeev «Nurtas Ońdasynov» alleıasynda aǵash otyrǵyzyp, elimizdiń barlyq óńirlerinde bolatyn ekologııalyq saǵat– jańa respýblıkalyq aktsııany bastap berdi, dep habarlaıdy QazAqparat oblys ákiminiń baspasóz qyzmetine silteme jasap.

Túrkistanda aptap ystyqtan saıa bolatyn jasyl beldeý jumysy barysynda aýdan men qala jurty asarlatyp, 220 myń túp aǵash egedi. Qazaqta «Júz jyldyǵyn oılaǵan halyq aǵash egedi» degen támsil sóz bar. «Eko saǵat!» respýblıkalyq aktsııasy aıasynda munda 20 túp kashtan, 30 lıp aǵashy men 50 túp arsha boı kótermek.

«Maqsatymyz – ózimiz ómir súrip jatqan kóne shahar Túrkistandy kógaldandyryp, kórkeıtý. Ońtústik óńiri aǵash ósirýge óte qolaıly aımaq. Aınalamyzdy jasyl jelekke bólep, qorshaǵan ortamyzdyń kógaldandyrýǵa bárimiz atsalysýymyz kerek. Osyndaı júıeli jumystyń nátıjesinde deni saý urpaq, baıandy bolashaq qalyptasady», – dedi Ómirzaq Estaıuly atalǵan sharanyń mańyzdylyǵyn alǵa tarta.

Túrkistan qalasy aınalasynan jasyl beldeý qurý maqsatynda búginde 488 gektar jerge 203 496 túp aǵash kóshetteri (qaraǵash, badam, órik, terek, jıde) egilgen. Sonymen qatar, búginde 2-kezeń boıynsha Arys-Túrkistan kanaly boıyndaǵy jerlerdi jappaı jyrtý jáne aǵash kóshetterin egý jumystary júrgizilýde. Aldaǵy ýaqytta jasyl beldeýge egiletin kóshetterdi óndirý maqsatynda 300 gektar jerge tuqymbaq ashyp, onyń 30 gektar aýmaǵyna aǵash tuqymdaryn sebý jáne 1212 gektar jerdi jyrtyp, 100 gektaryna aǵash kóshetterin egý jumystary atqarylmaq. Jalpy, respýblıkalyq mańyzy bar shara sheńberinde elimizde 1 mıllıon aǵash egiledi.