Asqar Mamın men Armen Sarkısıan ekonomıkalyq yntymaqtastyqty damytý keleshegin talqylady

NUR-SULTAN. QazAqparat - Qazaqstan Respýblıkasynyń Premer-Mınıstri Asqar Mamın Nur-Sultan qalasyna HІІ Astana ekonomıkalyq forýmyna qatysý úshin kelgen Armenııa Respýblıkasynyń Prezıdenti Armen Sarkısıanmen kelissózder júrgizdi, dep habarlaıdy QazAqparat primeminister.kz-ke silteme jasap.

Áńgimelesý barysynda ekonomıka salasyndaǵy qazaqstan-armıan qatynastarynyń ózekti máseleleri, ózara tıimdi yntymaqtastyqty, onyń ishinde Eýrazııalyq ekonomıkalyq odaq aıasyndaǵy ózara is-qımyldy keńeıtý jáne tereńdetý perspektıvalary talqylandy.

Taraptar atap ótkendeı, ózara is-qımylǵa Saýda-ekonomıkalyq yntymaqtastyq jónindegi úkimetaralyq komıssııa jumysyn kúsheıtý aıtarlyqtaı serpin beredi. Elderdiń naryqtaryna jasalǵan taldaý hımııa ónerkásibi, mashına jasaý jáne aýyl sharýashylyǵy salalaryndaǵy ózara jetkizilimderdi ulǵaıtý men saýda-sattyqty ári qaraı keńeıtý áleýetin kórsetti.

Armenııa Prezıdenti Armen Sarkısıan jasandy zerdeni, energetıkany, logıstıkany, avıatsııany, ǵarysh salasyn, argoónerkásiptik keshendi, qorshaǵan ortany qorǵaý, bilim berý jáne týrızm salasyn damytý turǵysynan tsıfrlandyrý salalary ekijaqty qarym-qatynasty tereńdetýge qyzyǵýshylyq týdyratynyn aıtty.

Óz kezeginde QR Úkimetiniń basshysy A. Mamın ekonomıkalyq qarym-qatynastardy tolyqqandy formatta damytýǵa, taýar aınalymy kólemi men ınvestıtsııalyq yntymaqtastyqty arttyrýǵa qyzyǵýshylyǵyn bildirdi.