Asqar Mamın memlekettik-jekeshelik áriptestik salasyna qatysty tapsyrmalar berdi
«Qazaqstanda osy ýaqytqa deıin memlekettik-jekeshelik áriptestik aıasynda 3 trln teńgege jýyq 1300 joba iske asyrylýda jáne ázirlenýde. Eń aýqymdy jobalar kólik jáne ınfraqurylym, energetıka, turǵyn úı-kommýnaldyq, bilim berý, densaýlyq saqtaý sektorlarynda iske asyrylýda. Jobalardyń sany men somasyna qarasaq, osy baǵyttaǵy jumystyń qarqyny jaman emes. Biraq memlekettik-jekeshelik áriptestiktiń áleýeti tolyǵymen júzege asyrylmaǵan dep aıtýǵa bolady. Birinshiden, búgingi baıandamashylar jobalardyń sapasy boıynsha másele kóterdi. Osyǵan baılanysty óńirlerge memlekettik-jekeshelik áriptestik jobalaryn qaraý kezinde bıýdjetten shyǵyndardy azaıtatyn jobalarǵa asa nazar aýdarýdy tapsyramyn», - dedi Úkimet basshysy.
Sonymen qatar A. Mamın ınfraqurylymdyq jobalardyń, onyń ishinde kólik jáne energetıkalyq, turǵyn úı-kommýnaldyq jobalardy iske asyrýdy jalǵastyrý qajet ekenin atap ótti. Osyǵan baılanysty Ulttyq ekonomıka mınıstrligi men basqa da múddeli memlekettik organdarǵa memlekettik-jekeshelik áriptestiktiń damýyn yntalandyrý, halyqaralyq aldyńǵy qatarly tájirıbe boıynsha qosymsha tetikterdi talqylaý júkteldi.
«Bul salada zańnamaǵa qajet ózgeristerdi pysyqtaý qajet. Densaýlyq saqtaý salasynda osyndaı jobalar qarqyndy damyp kele jatqanyn kórip otyrmyz. Bul baǵyttyń áleýeti eleýli. Sondyqtan Densaýlyq saqtaý mınıstrligi halyqaralyq tájirıbeni eskere otyryp, memlekettik-jekeshelik áriptestikti aldaǵy ýaqytta belsendi paıdalanýy tıis», - dedi Premer-Mınıstr.