Asqar Mamın Máskeýde TMD Úkimet basshylary Keńesiniń otyrysyna qatysty

MÁSKEÝ. QazAqparat – Máskeýde «Skolkovo» ınnovatsııa ortalyǵynyń alańynda Táýelsiz Memleketter Dostastyǵy (TMD) Úkimet basshylary keńesiniń kezekti otyrysy ótti, dep habarlaıdy «QazAqparat» HAA menshikti tilshisi.

Sharaǵa TMD elderiniń Úkimet basshylary men ókilderi qatysty. Qazaqstandyq delegatsııany QR Premer-Mınıstri Asqar Mamın bastap bardy.

Úkimet basshylary shaǵyn quramda TMD formatyndaǵy ekonomıkalyq ózara árekettestiktiń ózekti máseleleri boıynsha pikir almasty.

Keńeıtilgen otyrysta tsıfrlyq damý salasyndaǵy TMD-ǵa múshe elderdiń yntymaqtastyq tujyrymdamasy men ony júzege asyrýdaǵy birinshi kezektegi sharalar josparyna, sondaı-aq TMD-ǵa múshe memleketterdiń aqparattyq qaýipsizdigin qamtamasyz etý strategııasyna basty nazar aýdaryldy.

Sonymen qatar, Keńes otyrysy barysynda Dostastyq elderiniń standarttaý, veterınarııa, monopolııaǵa qarsy retteý, radıo navıgatsııasyn damytý salalarynda, ýran óndirisi saldarynan zardap shekken memleket aýmaqtaryn qalpyna keltirýde, TMD elderiniń Oıyndaryn ótkizýde, sondaı-aq zańsyz esirtki, psıhotroptyq zattar men prekýrsorlar aınalymyna qarsy kúrestegi yntymaqtastyqty retteıtin qujattarǵa qol qoıyldy.

Táýelsiz Memleketter Dostastyǵy organdarynyń qyzmetin qarjylyq qamtamasyz etý máselelerine jeke qujattar blogy arnaldy.

Sondaı-aq, búgin tústen keıin Eýrazııalyq ekonomıkalyq odaq (EAEO) elderiniń Úkimet basshylary men Eýrazııalyq ekonomıkalyq komıssııa (EEK) Alqasynyń tóraǵasy Tıgran Sarkısıannyń qatysýymen Eýrazııalyq úkimetaralyq keńestiń otyrysy ótedi.

Budan bólek, josparlanǵan is-sharalar aıasynda Qazaqstan Respýblıkasynyń Premer-Mınıstri A.Mamın men RF Premer-Mınıstri D.Medvedevtiń ekijaqty kezdesýi ótedi.

Avtor: Narymbek Ismaǵulov