Asqar Mamın Qazaqstandaǵy sanıtarlyq-epıdemıologııalyq ahýalǵa boljam jasady
«Ahýaldy ózderińiz de jaqsy bilesizder. Biz ony jaqsaryp keledi dep sanaımyz. Búginde «qyzyl» aımaqta eki óńir ǵana qalyp otyr. Olar: Pavlodar men Soltústik Qazaqstan oblystary», - dedi Úkimet basshysy BAQ ókilderimen kezdesý barysynda.
Premer-Mınıstr dereginshe, búginde elimizde 8 mln 880 myń adam koronavırýsqaqarsy vaktsınanyń birinshi komponentimen, al 7 mln 800 myń adam ekinshi komponentimen egilgen.
«Bul Táýelsiz Memleketter Dostastyǵyndaǵy eń joǵary kórsetkish. Qazir vaktsına alatyn azamattardyń sanatyn keńeıttik. Olar: emizýli balasy bar jáne júkti áıelder, sonymen qatar 12 men 18 jastaǵy mektep oqýshylary. Pfizer vaktsınasy jetkizildi. Munyń barlyǵy da bizge qazirgi sanıtarlyq-epıdemıologııalyq ahýaldy osy deńgeıde ustap turýǵa múmkindik beredi», - dedi Asqar Mamın.
Onyń atap ótýinshe, aýrýhanalardaǵy tósek-orynǵa, jalpy densaýlyq saqtaý salasyna júkteme tómendep otyr. Búginde elimizdegi ınfektsııalyq aýrýhanalar 30, al reanımatsııalyq tósek-oryndar 27 paıyzdyq júktememen jumys istep tur.
«Búginde ahýal turaqtandy dep sanaımyz. Joǵaryda atap ótken eki óńir qazirgi qarqynmen júre berse, onda «qyzyl» aımaqtan shyǵýy tıis dep esepteımiz. Osylaısha, búkil Qazaqstan qolaıly sanıtarlyq jaǵdaıda bolady», - dedi Premer-Mınıstr.