Asqar Mamın ınvestıtsııalar tartý boıynsha óńirlerge tapsyrma berdi
Ortalyq jáne jergilikti atqarýshy organdardy tyńdaý qorytyndylary jáne ınvestıtsııalar tartý jónindegi jumystardyń uıymdastyrylýy týraly QR ulttyq ekonomıka mınıstri R. Dálenov, ımportty almastyrý týraly – «Atameken» UKP tóraǵasy A. Myrzahmetov, AHQO-nyń óńirlerde ınvestıtsııalar tartý máseleleri boıynsha tásilderi týraly AHQO basqarýshysy Q. Kelimbetov baıandady.
Otyrysta ulttyq ekonomıkanyń ozyq qarqyn kórsetýin jalǵastyryp jatqany atalyp ótti. Bıylǵy 9 aıdyń nátıjeleri boıynsha ósý qarqyny 4,3% qurady. Halyqaralyq valıýta qory QR ekonomıkasynyń ósý boljamyn 2019 jyly 3,2%-dan 3,8%-ǵa deıin, 2020 jyly 3,2%-dan 3,9%-ǵa deıin arttyrdy. Azııa damý banki de QR ekonomıkasynyń ósýi boıynsha 2019 jyly kútiletin nátıjelerdi 3,5%-dan 3,7%-ǵa deıin kóterdi. Moody’s reıtıngtik agenttigi elimizdiń nesıelik baǵalanýyn turaqtydan pozıtıvtige arttyrdy. Dúnıejúzilik Ekonomıkalyq Forýmnyń Jahandyq básekege qabilettilik ındeksinde Qazaqstannyń pozıtsııasy 59-dan 55-orynǵa jaqsardy.
Qazaqstan boıynsha Eýropa qaıta qurý jáne damý (EQQDB) bankiniń basshysy A. Preımanıs jáne Qazaqstandaǵy Azııa damý banki (ADB) ókildiginiń dırektory Dj. Kapannellı Qazaqstannyń ekonomıkalyq jáne ınvestıtsııalyq saıasatyndaǵy oń qarqyndy atap ótti.
Ekonomıka ósiminiń qazirgi qarqynyn qoldaý men arttyrýdyń asa mańyzdy sharttarynyń biri — ınvestıtsııalar tartý jáne Qazaqstan ekonomıkasynyń kapıtal syıymdylyǵyn arttyrý. 2024 jylǵa qaraı negizgi kapıtalǵa salynǵan ınvestıtsııalar deńgeıin JІÓ 30% deıin jetkizý kózdelgen. Búginde 2020-2024 jyldary 41 trln-nan astam teńge ınvestıtsııa tartýǵa múmkindik beretin ınvestıtsııalyq jobalar pýly qurylǵan. Investıtsııalar ósiminiń negizgi draıverleri bazalyq ındýstrııalandyrý, AÓK, kólik, týrızm jáne saýda bolady.
«Elbasy Nursultan Nazarbaev pen Prezıdent Qasym-Jomart Toqaevtyń tapsyrmalaryna sáıkes, ekonomıka damýynyń ozyq qarqyndaryn qamtamasyz etý úshin, elimizge tikeleı sheteldik ınvestıtsııalardy tartý jumysyn sapaly túrde kúsheıtý qajet», — dedi A. Mamın.
Úkimet basshysy jumys istep turǵan ınvestıtsııalyq ınfraqurylymdy jetildirýdi, QR-nyń arnaıy ekonomıkalyq jáne ındýstrııalyq aımaqtarynda ınvestorlar úshin artyqshylyqtardy birizdendirýdi, memlekettik-jekemenshik áriptestiktiń damýyn jandandyrýdy, joǵary qosylǵan quny bar eksportqa baǵyttalǵan jobalardyń úlesin arttyrýdy tapsyrdy.
«Investıtsııalyq jobalardy ázirleý jáne daıyndaý máselesine neǵurlym sapaly qaraý qajet. Ol úshin konsaltıngtik kompanııalardyń jáne EQQDB, EADB, IDB, ADB tárizdi halyqaralyq qarjy ınstıtýttarynyń jáne basqalarynyń áleýetin elimizge kórsetiletin tehnıkalyq kómek aıasynda paıdalaný qajet», — dedi A. Mamın.
Premer-Mınıstr óńirlerdegi ınvestıtsııalyq belsendilikti damytý maqsatynda AHQO quqyǵymen jáne onyń ıýrısdıktsııasyn qoldanýmen qurylymdalǵan jobalardy iske asyrý boıynsha máselelerdi pysyqtaýdy tapsyrdy.
«Óńirlerde ınvestıtsııalyq jobalarmen tikeleı aınalysatyn ákimderdiń orynbasarlary bar. AHQO-nyń qarjy naryǵynyń qolda bar áleýeti men qoldanystaǵy quraldaryn barynsha paıdalanýdyń mańyzy zor. Úılestirý keńesiniń búgingi otyrysy óńirlerdiń AHQO-men yntymaqtastyǵynyń sapaly damýyna bastaý bolady dep senemin», — dedi A. Mamın.
Úkimet basshysy ortalyq memlekettik organdarǵa, ulttyq kompanııalarǵa jáne ákimdikterge ınvestıtsııalar tartý boıynsha bekitilgen nysanaly ındıkatorlarǵa qol jetkizip, alǵa qoıylǵan mindetterdi oryndaýdy qamtamasyz etýdi tapsyrdy.