Asqar Mamın ınternettiń sapasy men jyldamdyǵyn qamtamasyz etýdi tapsyrdy

NUR-SULTAN. QazAqparat – 25 tamyzǵa deıin oqýshylar men muǵalimder oqý jylynyń qashyqtan bastalýyna tolyq daıyn bolýy kerek. Bul týraly Premer-Mınıstr Asqar Mamın málim etti, dep habarlaıdy QazAqparat tilshisi.

«Bilim jáne ǵylym mınıstrligi ákimdiktermen birlesip, osy jyldyń 25 tamyzyna deıin oqýshylar men muǵalimderdiń oqý jylynyń qashyqtan bastalýyna tolyq daıyn bolýyn qamtamasyz etsin. Muǵalimder tıisti oqýdan ótkizilsin. Internet-platformalarda jáne teledıdarda qajetti kontent tolyq kólemde daıyndalsyn», - dep tapsyrdy A. Mamın Úkimet otyrysynda.

Sonymen qatar Premer-Mınıstr oqýlyqtar 25 tamyzǵa deıin berilýi kerektigin aıtty. Oqýlyqtardyń qaǵaz júzindegi nusqalarynyń bárinde mindetti túrde elektrondyq nusqalary bolýy tıis, olar qoljetimdi bolýy kerek.

«Tsıfrlyq damý mınıstrligi ákimdiktermen jáne baılanys operatorlarmen birlesip, bilim berý resýrstarynyń qoljetimdiligi men ornyqtylyǵyn, sondaı-aq eldi mekenderde ınternettiń sapasy men jyldamdyǵyn qamtamasyz etsin», - dedi Úkimet basshysy.

«Ákimdikter men Densaýlyq saqtaý mınıstrligi oqý oryndarynda, ásirese oqytýdy dástúrli ashyq túrde jalǵastyratyn jáne «kezekshi» bastaýysh synyptary bar mektepterde sanıtarııalyq-epıdemıologııalyq normalardy qatań saqtaý boıynsha barlyq qajetti sharalardy qabyldasyn. Jalpy, jańa oqý jylynyń bastalýyna barlyǵymyz úlken jaýapkershilikpen qaraýymyz kerek», - dedi Asqar Mamın.

Budan buryn habarlanǵandaı, Úkimet asa muqtaj otbasylardyń balalaryna paıdalaný úshin shamamen 500 myń kompıýter berýdi qamtamasyz etedi.