Asqar Mamın elordada ótip jatqan ǵarysh forýmyna qatysty
Úkimet basshysy «Roskosmos» korporatsııasynyń basshysy D. Rogozınmen jáne «One Web» kompanııasynyń qarjy dırektory T. Ýeınmen kezdesýler ótkizdi, olarmen Qazaqstannyń ǵarysh salasyn damytý máseleleri talqylandy.
«Elbasy N. Nazarbaev pen Prezıdent Q. Toqaev «Baıqońyr» ǵarysh aılaǵynyń ınfraqurylymyn damytýǵa jáne ony aldyńǵy qatarly standarttarǵa sáıkestendire otyryp, jańǵyrtýǵa erekshe kóńil bóledi», — dedi A. Mamın Forýmnyń ashylýynda.
Úkimet basshysy álemniń alǵashqy ǵarysh aılaǵy óziniń damýynyń jańa kezeńi qarsańynda ekenin, bul kúshterdi, ıdeıalardy jáne seriktestik qoldaýdy shoǵyrlandyrýdy qajet etetinin atap ótti.
«Elordamyz Nur-Sultan qalasynda Qazaqstan men Frantsııa kásiporyndarynyń kooperatsııasy aıasynda túrli maqsattaǵy spýtnıkterdi qurastyrýǵa jáne synaqtan ótkizýge múmkindik beretin Ǵarysh apparattaryn qurastyrý-synaý keshenin qurý aıaqtalýǵa jaqyndap qaldy. Bul joba turaqty jáne uzaq merzimdi qazaqstandyq-frantsýz ónerkásiptik kooperatsııasyna arnalǵan», — dedi A. Mamın.
Premer-Mınıstr qazaqstandyq kásiporyndar men vedomstvolardyń BAÁ, Túrkııa, AQSh, Iordanııa, Ońtústik Koreıa, Ýkraına, Ulybrıtanııa, Japonııa, Qytaı jáne basqa da kóptegen elderdiń ǵarysh salasyndaǵy uıymdarmen jumystary belsendi júrgizilip jatqanyn atap ótti. Jýyrda Jerdi dıstantsııalyq zondtaý derekterimen almasý, JDZ jerseriktik toptamalaryn birlesip óndirý jáne kommertsııalandyrý boıynsha yntymaqtastyqty damytý kózdelip otyr.
«Biz baılanys jerserigin óndirý boıynsha ónerkásiptik kooperatsııaǵa, Baıqońyr ǵarysh aılaǵynda birlesken ınvestıtsııalyq kommertsııalyq jobalardy júzege asyrýǵa ashyqpyz», — dedi A. Mamın.
Úkimet basshysy Forým qatysýshylaryna Qazaqstannyń baılanys ǵarysh júıelerin jáne JDZ qarjylandyrýdy $300 mln deıin jetkizý boıynsha josparlarymen bólisti, onyń ishinde jeke kapıtaldy tartý kózdelgen. Jaqynda Baıqońyr ǵarysh aılaǵynda «Báıterek» ekologııalyq qaýipsiz ǵarysh zymyran keshenin qurý boıynsha aýqymdy jobany iske asyrý bastalady, bul keshen reseılik taraptyń bastamasymen «Nazarbaev starty» dep qaıta ataldy.
«Baıqońyr ǵarysh aılaǵynda №1 «Gagarın starty» starttyq alańyn jańǵyrtý boıynsha jobany pysyqtaý júrgizilýde», — dedi A. Mamın.
«Qazaqstandaǵy ǵarysh kúnderi» halyqaralyq forýmy jyl saıyn 2013 jyldan beri ótkizilip keledi. Bıylǵy is-sharaǵa álemniń 25-ten astam elinen 650 qatysýshy — QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń basshylary, QR Parlamentniń Májilis jáne Senat depýtattary, Qazaqstan Respýblıkasynyń ǵaryshkerleri, sheteldik memleketterdiń elshilikteriniń ókilderi, «Roskosmos», «Airbus Defence and Space» korporatsııalarynyń ókilderi, otandyq jáne sheteldik uıymdar: «M. V. Hrýnıchev atyndaǵy MǴǴÓO», «M.F. Reshetnev atyndaǵy AJJ» AQ, «Transtelekom», «One Web», «Thales Alenia Space», SES, «Leica Geosystems, Satrec Initiative», «Eutelsat» jáne basqalary qatysty.