Asqar Mamın ekologııa máselelerine qatysty mınıstrler men ákimderge tapsyrma berdi
«Erekshe nazar aýdarý qajet birqatar másele bar. Birinshi, kómirtegi beıtaraptyǵyna qol jetkizý sharalary eleýli ózgeristerge ákeletinin eskerip, halyq, bıznes jáne jalpy ekonomıka úshin yqtımal shyǵyndardy barynsha naqty baǵalaý qajet. Osyǵan baılanysty Ulttyq ekonomıka mınıstrligine Kómirtegi beıtaraptyǵyna qol jetkizý strategııasynyń pysyqtalǵan jobasyn 2022 jylǵy 1 sáýirge deıin engizýdi tapsyramyn», - dedi Premer-Mınıstr Úkimettiń búgingi otyrysynda.
Sonymen birge, Úkimet basshysy qurylys qaldyqtary men qoqysqa arnalǵan polıgondardyń joqtyǵy ruqsatsyz qoqys úıindilerine ákep soǵatynyn eske saldy. Sondyqtan Ekologııa mınıstrligi ákimdiktermen birlesip, qoldanystaǵy zańnamanyń jańa talaptaryna sáıkes qurylys polıgondaryn jasaý máselesin pysyqtaýy qajet.
«Úshinshiden, «Jasyl Qazaqstan» ulttyq jobasynda 10 qalada iri kásiporyndardyń lastaýshy zattar shyǵarýyn azaıtý sharalary kózdelgen. Osyǵan baılanysty Ekologııa mınıstrligi ákimdiktermen birlesip, tıisti jol kartalaryn ázirlep, shyǵaryndylardy azaıtý kórsetkishterine qol jetkizý boıynsha pármendi sharalar qabyldasyn. Energetıka mınıstrligi ákimdiktermen birlesip, jeke sektor men sharýashylyq júrgizýshi sýbektilerdi gazdandyrý máselesin jandandyrýy qajet», - dedi Asqar Mamın.