Asqar Mamın EAEO-daǵy memlekettik satyp alýdy tolyqtaı elektrondy formatqa kóshirýdi usyndy

ALMATY. QazAqparat – QR Premer-Mınıstri Asqar Mamın Eýrazııalyq úkimetaralyq keńestiń (EÚAK) shaǵyn jáne keńeıtilgen quramdaǵy otyrystaryna qatysyp, olardyń barysynda EAEO keńistigindegi ekonomıkalyq ıntegratsııanyń ózekti máselelerin sheshý boıynsha birqatar bastama kóterdi, dep habarlaıdy QazAqparat tilshisi.

Premer EAEO boıynsha seriktesterge 68 tarmaqtan turatyn kedergilerdi eńserý tizbesi jónindegi máseleni sheshýdi usyndy.

«Búginde kelisilgen kedergiler tizilimi júrgizilip jatyr. Onda 68 kedergi kórsetilgen. Biz 3 jyl buryn bul tizilimdi 60 kedergiden bastaǵan bolatynbyz. Bul kórsetkishti azaıtýdyń ornyna, biz ókinishke qaraı, jańa kedergiler týyndatyp nemese olardy joıýdy kópke sozyp, jyldan-jylǵa olardyń sanyn kóbeıtip kelemiz», – dedi Asqar Mamın.

Qazaqstan Úkimetiniń basshysy 2021 jyldyń sońyna deıin EAEO elderinde júrgiziletin memlekettik satyp alýlardy tolyq elektrondy formatqa kóshirýdi usyndy.

«Elektrondyq tsıfrlyq qoltańbalardy ózara moıyndaý arqyly elektrondy formatta júrgiziletin memlekettik satyp alýlarǵa qatysýdy qamtamasyz etý – memlekettik satyp alýlar naryǵyn damytýdyń maqsattarynyń biri», – dedi ol.

Sondaı-aq, ol lıtsenzııasy joq ónimderdi qoldaný máselesine de toqtaldy.

«Búginde lıtsenzııalanbaǵan ónimderdi shyǵarý - búkil odaqta ótkir másele bolyp otyr. Baǵdarlamalyq jasaqtama óndirýshiler qaýymdastyǵynyń baǵalaýynsha, kórsetkish 75% quraıdy. Qazaqstandaǵy zańsyz baǵdarlamalar naryǵy - shamamen 90 mıllıon dollar»,– deıdi Asqar Mamın.

QR Úkimet basshysy EAEO aıasynda tsıfrlyq ekonomıka men qazirgi joǵary tehnologııaly salalardy damytý, sondaı-aq pırattyq ónimdermen kúresýdiń birlesken tásilderin ázirleý boıynsha birlesken jumystardy kúsheıtý qajettigin atap ótti.