Asqar Mamın COVID-19 indetinen kóz jumǵan qazaqstandyqtardyń otbasylaryna kóńil aıtty
13:40, 13 Shilde 2020
NUR-SULTAN. QazAqparat - QR Premer-Mınıstri Asqar Mamın koronavırýs ınfektsııasynan qaıtys bolǵan qazaqstandyqtardyń otbasylaryna kóńil aıtty, dep habarlaıdy Úkimettiń resmı saıty.
«Osynaý kúrdeli kezeńde Qazaqstan koronavırýs indetimen kúresýde. Ókinishke qaraı, qaýipti indettiń saldarynan bizdiń otandastarymyz da kóz jumýda. Qaıtys bolǵandardyń týǵan-týystary men jaqyndaryna asa qaıǵyra otyryp kóńil aıtamyn.
Memleket basshysynyń sheshimi boıynsha 13 shilde COVID-19 indetinen qaıtys bolǵan qazaqstandyqtardy eske alý úshin Jalpyulttyq aza tutý kúni bolyp jarııalandy.
Qabyldanyp jatqan sharalar halqymyzdyń tabandylyǵy men erik-jigerin jáne óz kúshine degen senimin taǵy bir kórsete otyryp, bizge indettiń taralýyn toqtatýǵa múmkindik beretinine senimdimin»,-delingen kóńil aıtý habarlamasynda.