Asqar Mamın Chevron ókili Todd Levımen kezdesti
Kezdesý barysynda munaı-gaz salasyndaǵy birlesken jobalardy iske asyrý aıasynda yntymaqtastyqty odan ári damytý máseleleri talqylandy. Chevron kompanııasy Qazaqstannyń munaı óndirý salasyndaǵy iri seriktesteriniń qatarynda, Teńiz, Qarashyǵanaq jobalaryna, Kaspıı Qubyr Konsortsıýmy munaı qubyryn keńeıtýge qatysady.
2018 jyly TShO munaı ónimderiniń kólemi 28,6 mln tonnany qurady.
Todd Levı bıyl munaı óndirý boıynsha josparly kórsetkishter asyra oryndalatynyn aıtty. Óz kezeginde, Bolashaq keńeıtý jobasyn - Saǵalyq qysymdy basqarý jobasyn iske asyrý 2022 jylǵa qaraı óndirýdi jylyna 12 mln tonnaǵa ulǵaıtýǵa jol ashady. TShO keńeıtý jobasyna 45 myńnan astam qazaqstandyq tartylǵan, bul qyzmetkerlerdiń jalpy sanynyń 91% quraıdy.
Kezdesýdi qorytyndylaı kele, QR Úkimetiniń basshysy Asqar Mamın munaı-gaz jáne munaı servısi salalaryndaǵy jergilikti óndiristi damytýdyń mańyzdylyǵyna toqtalyp ótti. Jabdyqtar men tehnıkany elimizde shyǵarý ındýstrııalandyrýdy damytýǵa qosymsha serpin beredi jáne jańa jumys oryndaryn ashýǵa jol ashady.
Taraptar yntymaqtastyqty joǵary baǵalaıtyndaryn aıtyp, áreket etip turǵan jobalardy jalǵastyryp, jańa birlesken jobalardy qolǵa alý turǵysynan strategııalyq seriktestikti jalǵastyrýǵa nıet bildirdi. QR-nyń ekonomıkalyq kórsetkishteriniń ósýi men ınvestıtsııalyq ahýaldy jaqsartý jónindegi turaqty jumystardy eskersek, ózara is-qımyldy odan ári keńeıte túsýge úlken áleýet bar.
Máseleni talqylaýǵa «QazMunaıGaz» UK» AQ basqarma tóraǵasy A. Aıdarbaev, QR energetıka vıtse-mınıstri M. Myrzaǵalıev qatysty.