Asqar Mamın Bakýde Ázerbaıjan Prezıdentimen kezdesti
QR Premer-Mınıstriniń baspasóz qyzmeti habarlaýynsha, A.Mamın Ázerbaıjan basshysyna QR Prezıdenti Nursultan Nazarbaevtyń sálemi men ystyq yqylasyn jetkizip, bıyl sáýirde Qazaqstan-Ázerbaıjan qarym-qatynasynyń ary qaraı damýyna serpin bergen Bakýge jasaǵan resmı saparynyń mańyzyn atap ótti.
Kezdesý barysynda saýda-ekonomıkalyq qarym-qatynastyń barlyq spektri boıynsha yntymaqtastyń damý bolashaǵy talqylandy.
«Ázerbaıjan - Kavkaz óńirindegi Qazaqstannyń iri strategııalyq seriktesi sanalady», - dedi A.Mamın.
Kezdesý kezinde QR Premer-Mınıstriniń birinshi orynbasary habarlaǵandaı, Qazaqstan-Ázerbaıjan úkimetaralyq komıssııasy 2017-2020 jyldarǵa arnalǵan QR men ÁR arasyndaǵy saýda-ekonomıkalyq yntymaqtastyqty keńeıtý boıynsha Jol kartasyn daıyndady.
I.Álıev Transkaspıı halyqaralyq kólik qatynasynyń áleýetin ulǵaıtý jáne Baký-Tbılısı-Kars jolyn paıdalanýǵa berýdegi Qazaqstannyń mańyzdy rólin atap ótti.
«Zamanaýı logıstıkalyq ınfraqurylymnyń saýda aǵyndaryn qamtamasyz etý jáne jetkizý jyldamdyǵy men baǵa boıynsha sapaly qyzmet kórsetý - tranzıttik dálizge qatysýshy elderdiń jańa naryqty ıgerýine jáne júk aǵyndaryn tartýyna múmkindik beredi», - dep atap ótti A.Mamın.
Taraptar Aqtaý, Quryq jáne Alıat saýda porttarynyń qyzmetin sınhrondaý qajettigin atap ótti.
Kezdesýde taraptar saýda aınalymyn arttyrý, sondaı-aq Ázerbaıjanǵa jylyna 1 mln tonna qazaqstandyq astyqty jetkizý boıynsha sharalar qabyldaýǵa kelisti.