Asqar Mamın BAÁ azyq-túlik qaýipsizdigi mınıstrimen birlesken ınvestjobalardy iske asyrýdy talqylady

NUR-SULTAN. QazAqparat - QR Premer-Mınıstri Asqar Mamın Birikken Arab Ámirlikteriniń (BAÁ) azyq-túlik qaýipsizdigi mınıstri Marıam ál Mýheırımen kezdesý ótkizdi, dep habarlaıdy QazAqparat Úkimet basshysynyń resmı saıtyna silteme jasap.

Kezdesýge BAÁ-niń iri bıznesteri — «Al Dahra Holding», «DP World», «Fish Farm» jáne t. b. ókilderi qatysty. Taraptar saýda-ekonomıkalyq, qarjy-ınvestıtsııalyq, kólik-logıstıkalyq, agroónerkásip, energetıka jáne basqa da salalardaǵy yntymaqtastyqtyń jaı-kúıi men perspektıvalaryn talqylady. QR Premer-Mınıstri Qazaqstan Respýblıkasy men Birikken Arab Ámirlikteri arasyndaǵy strategııalyq yntymaqtastyqtyń joǵary deńgeıin atap ótti.

2021 jyldyń 4 aıynda QR men BAÁ arasyndaǵy ózara taýar aınalymy $276 mln qurady, bul ótken jyldyń sáıkes kezeńindegi kórsetkishten 13,1%-ǵa artyq. Qazaqstannan BAÁ-ge eksport kólemi 38,7%-ǵa artyp, $247,8 mln jetti. 2020 jyly qarjy jáne kapıtal naryqtarynyń buryn-sońdy bolmaǵan qysqarýyna qaramastan, BAÁ-den Qazaqstan ekonomıkasyna tikeleı sheteldik ınvestıtsııalar kólemi 12,3%-ǵa artyp, $181,7 mln qurady.

QR Premer-Mınıstri BAÁ Úkimetiniń azyq-túlik qaýipsizdigin qamtamasyz etýge basa nazar aýdaratynyn eskere otyryp, yntymaqtastyqtyń basym baǵyty AÓK salasyndaǵy jobalardy birlesip iske asyrý ekenin atap ótti. Úkimet basshysy Qazaqstan álemdegi eń perspektıvaly AÓK ónimderin óndirýshilerdiń biri ekenin atap ótti. 2020 jyldyń qorytyndysy boıynsha the Economist Intelligence Unit reıtınginde Qazaqstan azyq-túlik qaýipsizdigi deńgeıi boıynsha 113 orynnyń ishinen 32-oryndy alyp, 2019 jylmen salystyrǵanda óz pozıtsııasyn 16 tarmaqqa jaqsartty. QR men BAÁ birlesken ınvestıtsııalyq jobalary qosylǵan quny joǵary, sondaı-aq Parsy shyǵanaǵy elderinde zor suranys áleýeti bar jańa óndiristerdi qurýdy kózdeıdi. Olardy iske asyrý Qazaqstanda jańa sapaly jumys oryndaryn qurýǵa, ozyq tehnologııalar men is-tájirıbeni engizýge múmkindik beredi. Bul rette QR BAÁ júzege asyryp jatqan 2051 jylǵa deıingi azyq-túlik qaýipsizdigi Strategııasynyń mańyzdy býynyna aınalady, al bul eki el arasyndaǵy ınvestıtsııalyq yntymaqtastyqty odan ári arttyrýǵa yqpal etedi.

BAÁ delegatsııasynyń QR-ǵa sapary nátıjesinde qus fabrıkalaryn («Alel Agro» jáne «Al Dahra Holding»), sút-taýar fermalaryn («Dinara Group» jáne «Al Dahra Holding») salý, sıyr jáne qoı etin óndirý («Nurym Group» jáne «Al Dahra Holding»), jemisterdi óndirý jáne qaıta óńdeý («Amal Bio» jáne «Al Dahra Holding»), balyq ósirý jáne qaıta óńdeý («Fish Farm»), astyq daqyldaryn óndirý jáne qaıta óńdeý («Olzha Agro» jáne «Al Dahra Holding») tárizdi baǵyttar boıynsha jobalardy daıyndaý jáne iske asyrý boıynsha jumystar júrgizilýde.

Kelissóz qorytyndysy boıynsha «Qazaqstan Temir Joly» UK» AQ men «DP World» kompanııasy arasynda Qazaqstannyń júk aǵynyn arttyrý jáne kólik-logıstıkalyq ınfraqurylymyn damytýdaǵy yntymaqtastyqty kózdeıtin nıettestik týraly hattamaǵa qol qoıyldy.

Kezdesýge Strategııalyq josparlaý jáne reformalar agenttiginiń tóraǵasy – AHQO Basqarýshysy Qaırat Kelimbetov, aýyl sharýashylyǵy mınıstri Saparhan Omarov, ındýstrııa jáne ınfraqurylymdyq damý mınıstri Beıbit Atamqulov, «Qazaqstan Temir Joly» UK» AQ basqarma tóraǵasy Nurlan Saýranbaev, «Kazakh Invest» AQ basqarma tóraǵasy Meıirjan ıÝsýpov, Qazaqstannyń tikeleı ınvestıtsııalar qorynyń basqarma tóraǵasy Nurlan Jaqypov, QR-nyń BAÁ-degi elshisi Madııar Meńilbekov jáne t. b. qatysty.