Asqar Mamın: Arhıv mańyzdy qujattardy saqtaýshy ulttyq resýrstar qoımasyna aınaldy

NUR-SULTAN. QazAqparat – QR Premer-Mınıstri Asqar Mamın Ulttyq arhıvtiń 15 jyldyǵy mereıtoıymen quttyqtady, dep habarlaıdy QazAqparat tilshisi.

Qazir elordadaǵy Elbasy kitaphanasynda el Táýelsizdiginiń 30 jyldyǵyna men Qazaqstan Respýblıkasy ulttyq arhıviniń 15 jyldyǵyna arnalǵan «Táýelsizdik jáne Elbasy: jasampazdyqtyń jańa tarıhy» halyqaralyq ǵylymı-praktıkalyq konferentsııa ótip jatyr.

Atalǵan sharanyń ashylý saltanatynda QR Premer-Mınıstri Asqar Mamınniń Ulttyq arhıvtiń 15 mereıtoıyna oraı quttyqtaý sózi oqyldy.

«Qazaqstan Táýelsizdiginiń 30 jyldyǵymen oraılas kelgen 15 jyldyq mereıtoılaryńyzben shyn júrekten quttyqtaımyn. Búginde memleket tarıhynyń derekti eskertkishi, qundylyqtar qazynasy sanalatyn Ulttyq arhıv Qazaqstan halqynyń tarıhı-mádenı murasynyń ajyramas bóligi. Jáne arhıv tarıhı, ǵylymı, ekonomıkalyq, saıası mańyzdy qujattardy saqtaýshy ulttyq resýrstar qoımasyna aınaldy. Jas memlekettiń jańa tarıhyn mazmunymen baıytyp kele jatqan eleýli oqıǵalardyń shejiresin jınaý, eńseli egemendigimizdiń árbir sátin bolashaq urpaqqa mıras etip qaldyrý, kózdiń qarashyǵyndaı saqtap qalý – sizder atqaryp jatqan ızgilikti is ekeni sózsiz», - delingen A. Mamınnyń quttyqtaý sózinde.

Sondaı-aq, Úkimet basshysy otandyq arhıv mamandaryna shyǵarmashylyq tabys tiledi.

«Otandyq arhıv isi salasyn jetildirý, qujattyq murany saqtaýmen qatar sheteldik áriptestermen tyǵys qarym-qatynas ornatyp, halyqaralyq yntymaqtastyqtyń damýyna qomaqty úles qosyp kelesizder. QR Ulttyq arhıvi ujymyna ózimniń jáne QR Úkimetiniń atynan tolaǵaı tabys tileımin. Elimizdiń egemendigin ulyqtaıtyn jobalardy júzege asyryp, Táýelsizdigimizdiń asyl qazynasy sanalatyn arhıv qujattaryn saf altyndaı saqtap, qundy derektermen toltyra beretinderińizge senim bildiremin. Osyndaı erekshe, mańyzdy kúni sizderge jańa shyǵarmashylyq jetistikter, ıgi bastamalaryńyzǵa tabys tileımin», - deıdi Premer-Mınıstr.

Aıta ketsek, halyqaralyq ǵylymı-praktıkalyq konferentsııaǵa elimizden bólek, Qyrǵyzstan, Túrkııa, Ózbekstan jáne Reseıden arhıv ókilderi men mamandary qatysyp jatyr.

Atalǵan sharany QR Tuńǵysh Prezıdenti – Elbasy kitaphanasy men QR Ulttyq arhıvi uıymdastyryp otyr.