Asqar Mamın Aqmola oblysynyń aktıvine jańa ákimdi tanystyrdy
Oblystyq máslıhattyń kezekten tys sessııasynda Asqar Mamın QR Prezıdenti Nursultan Ábishuly Nazarbaevtyń Aqmola oblysynyń ákimi qyzmetine Ermek Marjyqpaevty taǵaıyndaý týraly usynysy jazylǵan hatyn oqyp berdi. Máslıhat depýtattary kandıdatýrany biraýyzdan qoldady.
Óńir aktıvimen kezdesýde Premer-Mınıstr M. Myrzalınge oblys ákimi qyzmetindegi jumysy jáne óńirdiń áleýmettik-ekonomıkalyq damýyna qosqan úlesi úshin alǵys bildirdi. M. Myrzalınniń basshylyǵymen oblysta jańa áleýmettik nysandar salynyp, onyń ishinde týrızm salasynda iri ınfraqurylymdyq jobalar iske asyryldy.
«Memleket basshysy taǵaıyndaǵan barlyq qyzmetterde Málik Keńesbaıuly joǵary senimdi aqtaı bildi», - dedi Asqar Mamın jáne jańa qyzmetinde tabys tiledi.
Jańa ákimdi tanystyrǵan Asqar Mamın osy kúnge deıin E. Marjyqpaev Kókshetaý qalasynyń ákimi bolyp jumys istep kelgenin aıtty. Arshaly, Zerendi aýdandarynyń ákimi, Aqmola oblysy ákiminiń orynbasary retinde qyzmet etip, óńirdiń damýyna zor úlesin qosqan.
«Qazir oblystyń aldynda Elbasynyń "Áleýmettik qamqorlyq" jańa áleýmettik sharalary aıasynda aýqymdy mindetter tur. Azamattardyń ál-aýqatyn arttyrýǵa, halyqtyń áleýmettik-ekonomıkalyq jaǵdaıy men turmys sapasyn jaqsartýǵa baǵyttalǵan naqty sharalardy júzege asyrý qajet», - dedi A. Mamın.
Sonymen qatar, agroónerkásiptik keshenniń odan ári qarqyndy damýyn jedeldetip, týrıstik áleýetin damytý boıynsha naqty jumysty uıymdastyrý qajet.
«2020 jyly Kókshetaý qalasynda Qazaqstan men Reseı Óńiraralyq yntymaqtastyǵy forýmy ótkiziledi. Oblys osy mańyzdy is-sharanyń joǵary deńgeıde ótkizilýin qamtamasyz etýi kerek», - dep tapsyrdy QR Premer-Mınıstri.
Sońynda Asqar Mamın oblys aktıvimen birlesip ákim retinde E. Marjyqpaevtyń óńir aldyna qoıylyp otyrǵan barlyq tapsyrmalardyń sapaly oryndalýyn qamtamasyz etetinine senim bildirdi.