Asqar Mamın Aqmola oblysynda egis naýqanynyń júrgizilý barysyn tekserdi
Bıyl Aqmola oblysynda jazdyq egis aýmaǵy 4,9 mln ga quraıdy, onyń ishinde 4,4 mln ga – dándi daqyl. Búgingi tańda 581 myń ga (jospardyń 13,1%) dándi jáne dándi-burshaqty daqyldar, 39 myń ga astam maıly (15,5%) jáne 51 myń ga mal azyǵy (28,4%) daqyldary egilgen.
Egis jumystaryna shamamen 32 myń birlik aýyl sharýashylyǵy tehnıkasy jumyldyrylǵan. Atap aıtsaq, 14 myńnan astam traktor, 16 myń tuqym sepkish, 1 250 egis kesheni. Óńirde kóktemgi egis jumystaryn júrgizýge 68 myń tonna kepildendirilgen dızel otyny bólindi, onyń quny Memleket basshysynyń tapsyrmasy boıynsha fermerler úshin lıtri 165 teńgege deıin arzandatylǵan.
Aýyl sharýashylyǵy daqyldaryn egýdi ońtaıly merzimde – 20-25 jumys kúni ishinde aıaqtaý kózdelgen.
Úkimet basshysy Sandyqtaý jáne Aqkól aýdandarynyń alqaptaryndaǵy egis jumystarymen, jergilikti aýyl sharýashylyǵy kásiporyndarynyń materıaldyq-tehnıkalyq bazasymen, dándi jáne jem-shóp daqyldaryn óńdeý jáne tazalaý, sondaı-aq et jáne sút ónimderiniń óndirisin keńeıtý jobalarymen tanysty.
«Aýyl – el besigi» jobasynyń iske asyrylýyn baqylaý aıasynda Premer-Mınıstr Sandyqtaý aýdanynyń Maksımovka jáne Balkashıno aýyldarynda, sondaı-aq Aqkól aýdanynyń Eńbek aýylynda bolyp, onda áleýmettik ınfraqurylym nysandaryn — abattandyrylǵan turǵyn úılerdi, densaýlyq saqtaý, bilim berý jáne sport mekemelerin aralap kórdi.
Aqmola oblysynyń aýyl sharýashylyǵy jalpy óniminiń kólemi osy jyldyń tórt aıynyń qorytyndysy boıynsha 2019 jyldyń sáıkes kezeńindegi kórsetkishpen salystyrǵanda 3,5%-ǵa ósti. Óńdelgen et óndirisi 22,1%-ǵa (19 myń tonna), sút ónimderi 0,4%-ǵa (26 myń tonna), un 29%-ǵa (122 myń tonna) jáne ósimdik maıy 42,1%-ǵa (8 myń tonna) ósti.
Aqmolanyń aýyl sharýashylyǵy ónimin óndirýshileri elorda turǵyndaryn et jáne súttiń shamamen úshten bir bóligimen (33% jáne 34%-ǵa), taǵamdyq jumyrtqamen – 94%-ǵa qamtamasyz etedi. Óńirde et fermalaryn qurý jobalary júzege asyryla bastady, barlyǵy 7600 bas asyl tuqymdy iri qara mal satyp alýmen 111 et fermasy salynady. 2400 bas iri qara malǵa arnalǵan 18 sút-taýar fermasyn ashý jyl saıynǵy sút óndirisin kem degende 40 myń tonnaǵa arttyrýǵa múmkindik beredi.