Asqar Mamın ákimderge: Tutynýshylardy jylýmen qamtamasyz etýge jaýap beresizder
Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Jalpy óńirlerdiń ákimderi turǵyn úı-kommýnaldyq sharýashylyq, bilim berý, áleýmettik salalardy, jylý jáne energııa obektilerin jylytý maýsymyna daıyndaý boıynsha jaqsy jumys júrgizdi. Mysaly, Aqmola, Qaraǵandy, Qostanaı, Pavlodar, Soltústik Qazaqstan oblystarynyń jáne Almaty qalasynyń ákimdikteri áleýmettik sala obektileri men turǵyn úılerdi jylytý maýsymyna daıyndaý boıynsha jospardy 100 paıyz oryndady. Aqmola, Almaty, Shyǵys Qazaqstan, Batys Qazaqstan, Qostanaı, Pavlodar, Soltústik Qazaqstan oblystary men Almaty qalasy avtonomdy qazandyqtar úshin kómir daıyndaý jónindegi josparly kórsetkishterdi aıaqtady», - dedi Úkimet basshysy.
Sonymen qatar ol Aqmola, Aqtóbe, Qaraǵandy, Soltústik Qazaqstan, Pavlodar oblystarynda jáne Nur-Sultan qalasynda kommýnaldyq qajettilikter men halyq úshin otyn daıyndaý deńgeıi jetkiliksiz ekendigin atap ótti.
«Osyǵan oraı mynadaı tapsyrma beremin. Ákimder belgilengen merzimde barlyq josparlanǵan jóndeý jumystaryn jáne qajetti kólemde otyn (kómir, mazýt, gaz) jetkizýdi aıaqtasyn. Energııa óndiretin jáne energııa beretin uıymdarmen birlesip, jylytý maýsymyn júrgizýge daıyndyq pasporttaryn tez arada alýdy qamtamasyz etsin. Tutynýshylardy sapaly jylýmen qamtamasyz etýge jeke jaýap beresizder», - dedi Asqar Mamın.